Սա ոչ թե տարածքային, այլ ազգերի ինքնորոշման իրավունքի խնդիր է. Գերմանիայում ՀՀ դեսպանը՝ «Тagesspiegel»-ին

Ապրիլին Գերմանական հայտնի «Тagesspiegel» պարբերականը Հայ-գերմանական դիվանագիտական հարաբերությունների հաստատման 25-ամյակի առիթով Հայաստանի մասին լայնածավալ հոդված է տպագրել, որում, մասնավորապես անդրադարձ է կատարվել ՀՀ տնտեսությանը, տեղեկատվական տեխնոլոգիաների ոլորտին, զբոսաշրջության ներուժին, գինեգործությանը, հայ ժողովրդի պատմությանը, պատմամշակութային ժառանգությանը, Երեւանի կոնյակի գործարանի եւ, ընդհանրապես, հայկական կոնյակի պատմությանը, ինչպես նաեւ Հայաստանում գործող գերմանական «Քրոնիմեդ» ընկերության հաջող ձեռնարկատիրական գործունեությանը:

Պարբերականում առանձին տեղ է զբաղեցնում Գերմանիայում ՀՀ դեսպան Աշոտ Սմբատյանի՝ «Հայաստանը ժողովրդավարության ճանապարհին» վերնագրով հարցազրույցը: Հարցազրույցում  դեսպանն անդրադարձել է  Հայաստանի եւ Գերմանիայի միջեւ դիվանագիտական հարաբերությունների հաստատման 25-ամյակին` նշելով, որ Գերմանիան Հայաստանի կարեւոր տնտեսական եւ քաղաքական գործընկերներից է: Դեսպանը կարեւորել է նաեւ Գերմանիայի դերը Հայաստան-ԵՄ համագործակցություն ընդլայնման գործում:

Ա. Սմբատյանը անդրադարձել է Հայաստանի` ժողովրդավարության ամրապնդման ուղղությամբ իրականացված քայլերին, Սահմանադրական բարեփոխումներին եւ ապրիլին կայացած խորհրդարանական ընտրություններին:

Հարցազրուցում շոշափվել են նաեւ տարածաշրջանային մի շարք հիմնահարցեր։ Այնպիսին, ինչպիսիք են Հայաստան-Թուրքիա առնչությունները, Հայոց ցեղասպանության ճանաչման եւ դատապարտման կարեւորությունը, ԼՂ հակամարտության կարգավորման գործընթացը: Դեսպանը կարեւորել է ԵԱՀՄ Մինսկի խմբի համանախագահ երկրների դերակատարությունը հակամարտության կարգավորման գործում` ընդգծելով, որ խնդիրն ի վերջո պետք է լուծվի Լեռնային Ղարաբաղի ժողովրդի կողմից իրավաբանորեն պարտադիր կամարտահայտության միջոցով: Դեսպանն ընդգծել է, որ սա ոչ թե տարածքային խնդիր է, այլ մարդու իրավունքների եւ ազգերի ինքնորոշման իրավունքի խնդիր: Ա. Սմբատյանը նշել է, որ հակամարտությունը չի կարող լուծվել ռազմական ճանապարհով եւ խաղաղ բանակցային գործընթացն այլընտրանք չունի:

Լրագրողի այն հարցին, թե դեսպանը ինչ կերպ է տեսնում Հարավային Կովկասը 25 տարի անց, Ա. Սմբատյանը նշել է, որ ինքը մարգարե չէ եւ չի կարող գուշակել, սակայն ցանկանում է, որպեսզի տարածաշրջանի բոլոր ժողովուրդները խաղաղ եւ ինքնորոշված համագոյակցեն միմյանց հետ:

Հարցազրույցի գերմաներեն տարբերակը հասանելի է ԱՅՍՏԵՂ: