Արևիկ Գևորգյան. «Սիրելիիս հանդիպելուց հետո ամեն բան փոխվել է» դերասանուհին ռոմանտիկ լուսանկար է հրապարակել

«Աննա», «Քաղցր կյանք», «Գեներալի աղջիկը», «Մեր գյուղը» հեռուստասերիալներից հանրությանը հայտնի դերասանուհի Արևիկ Գևորգյանին վերջին շրջանում հազվադեպ ենք տեսնում էկրաներին։ Թատերական ինստիտուտի երրորդ կուրսի ուանողուհին այս փուլում առավել կարևորում է ուսումը, սակայն նև նկարահանվում է ռուսական մի ֆիլմում։ BlogNews-ն Արևիկի հետ զրուցել է գործունեության այս շրջանի, ինչպես նաև՝ անձնական կյանքում եղած փոփոխության մասին։)

– Արևիկ, ինչո՞վ ես զբաղվում այս փուլում։

– Սանկտ Պետորբուրգում նկարահանվում եմ կենսագրական ժանրի գեղարվեստական ֆիլմում։ Մոտ 4 ամիս նկարահանումների եմ լինելու։ Արդեն 2 անգամ մեկնել եմ Սանկտ Պետորբուրգ՝ նկարահանումների։ Ֆիլմում կերպարս առանցքային է, սակայն այլ մանրամասներ բացահայտել չեմ կարող, քանի որ պայմանագրի համաձայն՝ չպիտի նախապես հարցազրույց տամ ֆիլմի մասին։

– Հետաքրքիր է, ինչպե՞ս ստացար ռուսական ֆիլմում խաղալու առաջարկ։

-Վիդեոփորձին մասնակցելու հրավերն այստեղից է եղել, քանի որ քասթինգ-կենտրոնները համագործակցում են։ Մենախոսություն կարդացի, ռեժիսորը նայել և հաստատել է կերպարս։

– Արդեն երկար ժամանակ է, ինչ չես նկարահանվում հեռուստասերիալներում։ Հասկացար, որ դա քոնը չէ՞, թե՞ համապատասխան առաջարկ չունես։

– Սերիալների դեմ ոչինչ չունեմ, որովհետև կան նյութեր, որոնք անհնար է բացել 1 ժամվա ընթացքում։ Շատ նորմալ եմ վերաբերում երկարատև սերիալներին, իսկ չնկարահանվելուս համար 2 պատճառ ունեմ՝ ուսումս և լավ առաջարկի բացակայությունը։

-Ո՞րն է քեզ համար լավ առաջարկի չափորոշիչը։ Հոնորարի չափն ի՞նչ դեր ունի այս հարցում։

-Հարցն այդքան ֆինանսին չի  վերաբերում, չնայած դրա չափաբաժինն էլ, իհարկե, կա։ Առաջնային պետք է սցենարը հետաքրիր լինի, կերպարը բացվելու տեղ ունենա, ֆիլմը՝ ասելիք։

– Վաղ տարիքից նկարահանվել ես սերիալներում։ Երբ սովոր ես լինում սեփական գումարն աշխատելուն, բարդ չէ՞ հարմարվել առանց եկամուտի ապրելուն։

-Եթե ընթացիկ նկարահանումներ լինում են, ֆինանսական առումով էլ է շատ լավ լինում։ Չեմ կարող ասել, որ ինձ չի  հուզում ֆինանսական ճգնաժամը, բնականաբար, լինում են դժվար պահեր, սակայն պետք է դիմանաս. եթե ընտրություն անեի՝ նկարահանվել սերիալներո՞ւմ, թե՞ ընդունվել Թատերական և ստանալ հիմքային կրթություն, բացարձակ չէի նայի ֆինանսական կողմին։ Կրթություն ստանալը նախ և առաջ խոսում է իմ ապագայի մասին։ Ես կարող էի հիմա նկարահանվել սերիալներում, ինչ-որ գումար ունենալ, բայց դա չնպաստեր իմ աճին։ Ես ուզում եմ լինել պահանջված, ոչ թե հայտնի։

-Թատերական ներկայացումներում հիմա խաղո՞ւմ ես։

-Չէ, որովհետև մեր դասերը շատ ծանրաբեռնված են։ Ամեն տարի որպես քննություն ներկայացում ենք հանձնում, և ժամանակը չի ներում ավելի շատ ներկայացումներում ներգրավված լինել։

-Արևիկ, մոտ կես տարի է՝ ընտրյալ ունես:) Քո ֆեյսբուքյան էջին հետևելով, կարելի է ենթադրել, որ քեզ մոտ երջանիկ, խաղաղ փուլ է։ Ի՞նչ է փոխվել կյանքումդ նրան հանդիպելուց հետո։

-Կարելի է ասել՝ ամեն ինչ։ Կար Արևիկ, մինչ  նրա հետ հանդիպումը և  հանդիպումից հետո։ Անգամ դժվարանում եմ ինձ հիշել այն ժամանակ, երբ նա չկար իմ կյանքում։ Տպավորություն է, որ նա միշտ եղել է ենթագիտակցությանս մեջ, միշտ սպասել եմ իրեն։ Ես, ինչպես բոլոր աղջիկները,  նկարել եմ իրեն ու հիմա մեկ-մեկ զարմանում եմ ինչքան համապատասխան է ինքն իմ պատկերացումներին, ասում եմ՝ ինձ թվում է դերձակը քեզ հատուկ ինձ համար է կարել։ Փոխվել է այն, որ եթե ես նախկինում միանշանակ կընտրեի կարիերաս, հիմա կընտրեմ ընտանիքը։

Չեմ սիրում շատ խոսել այդ մասին, քանի որ դա անձնական է։ Միայն կասեմ, որ ամեն ինչ  շատ գեղեցիկ է և կուզեմ, որ երբեք չվերջանա։ Վստահ եմ, որ չի վերջանա։

-Իսկ նա քեզ դնո՞ւմ է «կարիերա, թե ընտանիք» ընտրության առաջ։

-Չէ։ Ես թույլ չեմ տա, որ հերթը հասնիդրան։ Եթե զգամ, որ կարիերաս ինչ-որ չափով խանգարում ք անձնականին, ինքս կհրաժարվեմ ամեն ինչից՝ արժևորելով ինձ համար այս պահին ավելի կարևորը։

– Ամեն դեպքում, շոուբիզնեսային ոլորտը շատերի կողմից ավելի վատ է ընկալվում։ Ինքն  այս առումով ի՞նչ ընկալում ունի ու ինչպե՞ս է վերաբերում քո կարիերային։

-Ես ինձ երբեք չեմ համարել շոու բիզնես մեջ, ես ուղղակի նկարահանվում եմ, զբաղվում եմ իմ աշխատանքով, անընդհատ ստեղծագործական փուլերի մեջ եմ։  Ինքն էլ չի համարում, որ ես շոու բիզնեսի մեջ եմ։ Իմ յուրաքանչյուր առաջարկ իրար հետ ենք քննարկում, որոշումները միասին ենք կայացնում։