Ընտրովի պաշտոնը նվեր չեն ստանում. Տարոն Մարգարյան

«Առավոտ» թերթը գրում է ․

Երևանի ավագանու ՀՀԿ թեկնածու և գործող քաղաքապետ Տարոն Մարգարյանը երեկ Դավիթաշեն վարչական շրջանում նախընտրական քարոզարշավի էր: Իհարկե, դժվար է այն քարոզարշավ անվանել, թեկնածու Մարգարյանի ելույթները Դավիթաշենի 2 բակերում տևեցին 5 րոպե, իսկ ելույթները նույնությամբ կրկնվեցին, որոնք այլ վարչական շրջաններում Մարգարյանը հնչեցնում էր:

Ելույթներից հետո Տարոն Մարգարյանից լրագրողները հետաքրքվեցին՝ Դավիթաշենում հատված ծառերի գործով ձերբակալված անձը ազատ է արձակվել, փաստաբանը պնդում է, որ դա խորը էտ է եղել, ոչ թե ապօրինի ծառահատում, իսկ Մարգարյանը դա անվանել է «վանդալիզմություն», Մարգարյանը պատասխանեց, ավելի ճիշտ պնդեց. «Դա խորը էտ չի եղել»:

«Առավոտի»այն հարցին էլ, որ Մարգարյանի մրցակից, երևանի ավագանու «Ելք» դաշինքի քաղաքապետի թեկնածու Նիկոլ Փաշինյանն օրերս քարոզարշավի ժամանակ հայտարարել է, որ Տարոն Մարգարյանը Ավանի թաղապետի պաշտոնը ՀՀ նախագահից նվեր է ստացել իր ծննդյան օրը, իսկ մինչ այդ  Մարգարյանն իր քաղաքական կարիերան «ստեղծել է»իր հոր՝ նախկին վարչապետ Անդրանիկ Մարգարյանի շնորհիվ, նրա աջակցությամբ պաշտոններ ստացել, պարոն Մարգարյանը պատասխանեց, որ ինքը ՀՀԿ-ի շարքերում է 1996 թվականից: Ինչ վերաբերում է պաշտոնը նվեր ստանալուն, Մարգարյանն ասաց. «Ես ընտրվել եմ թաղապետ, ընտրովի պաշտոնը նվեր չեն տալիս: Երևի իրանք են ցանկացել միշտ նվերներ ստանալ»:

Անդրադառնալով Երևանի ավագանու մյուս ուժերի ներկայացուցիչների՝ տրասնպորտի վերաբերյալ քաղաքապետին ուղղված մեղադրանքներին և քաղաքապետարանի ծառայողական մեքենաներին՝ Տարոն Մարգարյանն ասաց. «Ինչո՞ւ նոր հիշեցին այս խնդիրը: Իսկ մեր ընդդիմախոսները օգտվո՞ւմ են տրանսպորտից կամ ընտրություններից հետո տրանսպորտի՞ց են օգտվելու»: Ապա Մարգարյանը վստահեցրեց, որ կարճ ժամանակում տրանսպորտի խնդիրն էլ կլուծվի, խորհրդատու կազմակերպություն կա: Մեր հարցին՝ ուղեվարձի թանկացում նախատեսվա՞ծ է տրասնպորտային խնդրի լուծման արդյունքում, Մարգարյանը պատասխանեց. «Ամեն ինչ անելու ենք, որ մեր սոցիալական խմբերին լրացուցիչ բեռ չավելացնենք»: Իսկ մյուս խմբերի համա՞ր՝ մեր այս հարցին էլ Մարգարյանն այսպես պատասխանեց, «Մենք ամեն ինչ անելու ենք, որ էդ խնդիրը չլինի: Հիմա ես ուզում եմ հասկանամ ու ձեզ ուղիղ հարց տամ՝ 1 կանգառ գնալու համար 100 դրամ եք վճարում, 7 կանգառ գնալու համար՝ 100 դրամ: Կարող ա էդ 1 կանգառ գնալու համար 20 դրամ ա, խի՞ եք 100 վճարում»:

Ինչ վերաբերում է այն մեղադրանքներին, որ մինչ օրս աղբի վերամշակման գործարանը կառուցված չէ, Տարոն Մարգարյանն ասաց, որ իրենց նախընտրական ծրագրում այն նախատեսված է. «Հին աղբավայրը ամբողջությամբ ծածկում ենք, կանաչ տարածք ենք ստանում և այդ նոր աղբավայրում աղբի վերամշակման գործարան ենք կառուցելու: Մի քանի ամիս հետո միջազգային մրցույթ կհայտարարենք, ով կշահի՝ կսկսենք աշխատանքները»: Նելլի Բաբայան