Բրեդ Փիթը՝ Անջելինա Ջոլիից սկանդալային ամուսնալուծության մասին (լուսանկարներ)

53-ամյա աշխարհահռչակ դերասան Բրեդ Փիթը դարձել է GQ Style ամսագրի հերոսը և անկեղծ հարցազրույց տվել՝ անդրադառնալով նաև Անջելինա Ջոլիից սկանդալային ամուսնալուծությանը: Ներկայում դերասանն ապրում է Լոս Անջելեսում գտնվող իր տանը, նրան ընկերակցում է Ժակ անունով բուլդոգը:

Փիթի խոսքով՝ ինքը և Ջոլին պայմանավորվածություն են ձեռք բերել 6 երեխաների համատեղ խնամակալության հարցի շուրջ: Այժմ ոչ մեկ կողմ չէ, որպեսզի ծնողներից միայն մեկը ստանձնի երեխաների խնամակալությունը:

«Ես հրաժարվել եմ այդ գաղափարից և, բարեբախտաբար, իմ նախկին կինը համաձայն է դրա հետ: Դա բացասական է ազդում երեխաների վրա, որոնց ընտանիքը քայքայվել է: Մենք պետք է ավելի զգույշ և նրբանկատ լինենք այս հարցում»,-ասել է դերասանը:

Բրեդը պատրաստվում է լավ հարաբերություններ ունենալ Անջելինայի հետ: «Տեսնում եմ՝ ինչ է կատարվում ընկերներիս հետ ամուսնալուծության ժամանակ: Ամուսիններից մեկը բառացիորեն ցանկանում է ոչնչացնել մյուսին: Նրանք տարիներ են ծախսում այդ ատելության վրա: Ես չեմ ցանկանում այդպես ապրել»,-հավելել է նա:

Դերասանի խոսքով՝ առաջին ցանկությունը այդ հարաբերությունները պահպանելն էր: «Բայց այնուհետև հիշում ես բոլորին հայտնի արտահայտությունը «Եթե սիրում ես, բաց թող»: Այժմ իմ փորձից հասկանում եմ՝ ինչ է դա նշանակում: Նշանակում է սիրել առանց տիրելու իրավունքի»,-ասել է Փիթը:

Բրեդ Փիթը նաև նշել է, որ վերջին 6 ամիսների ընթացքում վերանայել է իր հայացքները: Այժմ նրա կյանքում առաջին տեղում է ընտանիքը, երեխաները, ոչ թե աշխատանքը: