Լեռնային Ղարաբաղը թեկուզ չճանաչված, սակայն երկիր է. ՀՀ պաշտպանության նախարար

Լեռնային Ղարաբաղը, թեկուզ չճանաչված, սակայն երկիր է, ոչ թե հակամարտություն։ Այս մասին հայտարարել է ՀՀ պաշտպանության նախարար Վիգեն Սարգսյանը՝ «Ինտերֆաքս»-ի հետ իր հացրազրույցում։

«Ինչպես ձեզ հայտնի է՝ Պաշտպանության նախարարությունը բանակցային գործընթացով չի զբաղվում։ Ես կարծում եմ, կարգավորման հեռանկարները ձեզ ավելի լավ կմեկնաբանեն, հավանաբար, նախագահների վարչակազմերում եւ արտաքին գործերի նախարարություններում։ Բայց մոսկովյան ֆորումում իմ ելույթի ժամանակ ես հայտարարել եմ այն մասին, որ վստահ եմ, որ հակամարտությունները, որոնք գոյություն ունեն հիմա եւ մեր տարածաշրջանում, եւ աշխարհում առհասարակ, ռազմական լուծում չունեն։ Միակ գործոնը, որն ի հայտ է գալիս ուժ կիրառելու հետեւանքով, այս կամ այն կողմի վրա ճնշման գործոնն է՝ բանակցային գործընթացում ավելի մեծ ամրություն ցուցաբերելու համար։ Արդյունքում միեւնույն է պետքէ  բանակցություններ լինեն, պետք է խաղաղության համաձայնագիր լինի։ Եւ որքան խորն է փակուղի մտնում դիմակայությունը, ատելությունը, ագրեսիան, այնքան ավելի բարդ է հետո լուծել նման հակամարտությունները։

Մենք ելնում ենք այն բանից, որ ղարաբաղյան հակամարտության ռազմական լուծում պարզապես գոյություն չունի։ Մենք հույս ունենք, որ դա լավ են հասկանում նաեւ Ադրբեջանում։ Մենք մեծ հույս ունենք, որ Բաքվում որոշումներ ընդունելու համար պատասխանատու մարդիկ հասկանում են, որ շատ հեշտ է  բացել դռները քաոսի եւ իսկապես լայնածավալ ռազմական գործողությունների, ամբողջ տարածաշրջանում լարվածության համար, որոնք շատ բարդ կլինի դադարեցնելը։ Դա անպայման տարածաշրջանում կուժգնացնի ահաբեկչական խմբավորումների դերը, կաճի նաեւ ոչ տարածաշրջանային խաղացողների դերը, որոնք կսկսեն դրանից օգտվել։

Պանդորայի նման արկղը միշտ էլ կարելի է բացել։ Դրանից հետո հակամարտությունը կարգավորել անհավանական բարդ կլինի։ Եւ այդ իմաստով, իհարկե, ես հույս ունեմ, որ արտաքին գործերի նախարարներին կհաջողվի ինչ-որ շփման կետեր գտնել։ Չնայած հնարավորություների շրջանակը շատ սահմանափակ է։

Լեռնային Ղարաբաղը, թեկուզ չճանաչված, բայց երկիր է, ոչ թե հակամարտություն։ Եւ քանի դեռ այդ փաստի ամբողջական ընկալում տեղի չունենա, կարգավորում չի լինի։ Այնտեղ արդեն քառորդ դար է դե ֆակտո անկախության պայմաններում ապրում են միանգամայն իրական մարդիկ։ Նրանք պատասխանատու են իրենց որոշումների ընդունման համար, նրանք ձեւավորում են իրենց կառավարությունը շատ ժողովրդավարական պայմաններում, տեղի է ունենում բազմախմբակցային խորհրդարանի ձեւավորում», - հայտարարել է նախարարը։