Оլանդը պաշտոնաթող լինելուց առաջ նախարարների խորհրդի վերջին նիստն է անցկացրել

Ֆրանսիայի նախագահ Ֆրանսուա Օլանդը Ելիսեյան պալատում անցկացրել է Հանրապետության Նախարարների խորհրդի վերջին նիստը։ Խորհրդի նիստին մասնակցել են բոլորը՝ 17 նախարարներն ու 20 պետական քարտուղարները, հաղորդում է «ՏԱՍՍ»-ը։

«Կառավարությունը միաձայնորեն շնորհակալություն ու երախտագիտություն է հայտնել հանրապետության նախարարին իր աշխատանքի համար, որը նա վերջին հինգ տարում տարավ ինչպես երկրում, այնպես էլ միջազգային մակարդակով», - նիստի ավարտից հետո լրագրողներին ասել է Ֆրանսիայի վարչապետ Բերնար Կազնյովը։

Նրա խոսքով՝ վերջին խորհրդակցության ընթացքում ամփոփվել են սոցիալիստների հնգամյա կառավարման արդյունքները, մասնավորապես՝ արձանագրվել են «կոնկրետ արդյունքներ, որոնք ձեռք են բերվել արտադրության, ներդրումների ու ձեռնարկատիրության վերականգնման ոլորտում»։ «Տնտեսական աճի թվերն ավելի լավն են դարձել, քան հինգ տարի առաջ, առաջին անգամ անցյալ տարի մեր երկրում մոտ 200 հազար աշխատատեղ է ստեղծվել եւ 12 տարվա ընթացքում առաջին անգամ գործազրկությունն անկում է ապրել»,-ասել է նախարարների կաբինետի ղեկավարը։

Ֆրանսուա Օլանդն ինքը ջերմորեն հրաժեշտ է տվել նախարարների կաբինետի անդամներին Ելիսեյան պալատի շեմին, սակայն նիստի ժամանակ հրաժեշտի խոսքեր չի ասել։ Այսօր նորընտիր նախագահ Էմանուել Մակրոնի հետ նա կմասնակցի Ֆրանսիայում ստրկության չեղարկմանը նվիրված Փարիզում կայանալիք հիշատակի արարողությանը։