Երկու ոստիկանի սպանության մեջ մեղադրվող «Սասնա ծուռ» Սմբատ Բարսեղյանը չի ընդունում մեղադրանքը. Հայկ Ալումյան

«Սասնա ծռեր» զինված խմբի անդամ Սմբատ Բարսեղյանը չի ընդունում իրեն առաջադրված մեղադրանքը։ Այս մասին NEWS.am–ի հետ զրույցում ասել է Սմբատ Բարսեղյանի փաստաբան Հայկ Ալումյանը։

Նշենք, որ ոստիկանության ՊՊԾ գնդի զինված զավթման գործով 14 մեղադրյալների մասով քրգործն ուղարկվել է դատարան: Սմբատ Բարսեղյանը մեղադրվում է երկու անձի  սպանության մեջ։

«Սմբատ Բարսեղյանը իրեն առաջադրված մեղադրանքը չի ընդունում, իսկ  մեղադրանքի հետ կապված մենաբանություններ ես կարող եմ ներկայացնել  միայն Սմբատ Բարսեղյանի հետ քննարկելուց  հետո»,–ասել է Հայկ Ալումյանը։

Նշենք, որ ըստ ՀՔԾ տարածած հաղորդագրության՝ հարձակման ընթացքում զինված խմբի անդամ Սմբատ Բարսեղյանի կողմից սպանվել է ՊՊԾ գնդի հրամանատարի տեղակալ, ոստիկանության գնդապետ Արթուր Վանոյանը: Բացի այդ, 2016 թվականի հուլիսի 30-ին Սմբատ Բարսեղյանի կողմից սպանվել է նաև ՀՀ ՈԶ թիվ 1033 զորամասի ծառայող, ոստիկանության ենթասպա Յուրի Տեփանոսյանը:

Սմբատ Բարսեղյանին առաջադրվել է մեղադրանք հետեւյալ հոդվածներով՝ ՀՀ քրեական օրենսգրքի 235-րդ հոդվածի 3-րդ մասով (Կազմակերպված խմբի կողմից զենք-զինամթերք ձեռք բերելը, կրելը), 104-րդ հոդվածի 2-րդ մասի 1-ին, 2-րդ, 3-րդ եւ 11-րդ կետերով (պատանդ վերցնելով զուգորդված սպանությունը), 218-րդ հոդվածի 3-րդ մասի 1-ին կետով (կազմակերպված խմբի կողմից պատանդ վերցնելը) , եւ 238-րդ հոդվածի 4-րդ մասի 1-ին եւ 2-րդ կետով (կյանքի համար վտանգավոր եղանակով խոշոր չափի զենք, ռազմամթերք հափշտակելը)։