Կարծելով , թե անբուժելի հիվանդ է, որդին ինքնասպան է եղել. հայրը, դա տեսնելով, արել է նույնը

«Լավ ընտանիք էր, միայն այդքանը կարող եմ ասել», «Նրանք շփվող չէին, ընդամենը հանդիպելիս բարեւում էինք», «Փակ ընտանիք էր, նորմալ, լավ մարդիկ էին»,- մայիսի 10-ին իրենց բնակարանում կախված վիճակում հայտնաբերված հոր եւ որդու մասին այսպես էին արտահայտվում հարեւանները:

Հայրը` 63-ամյա Հարություն Հակոբյանը, Երեւանի Սվաճյան փողոցի շենքերից մեկում ապրում էր երկու որդիների հետ: Ընտանիքի մայրը մահացել է մոտ տասը տարի առաջ:  

Հարեւանների տեղեկություններով, կրտսեր որդին, երբ տուն գալով տեսել է, որ եղբայրն ու հայրը զանգերին չեն արձագանքում, զանգահարել է մորաքրոջը: Վերջինս էլ դիմել է փրկարար ծառայության օգնությանը: Փրկարարները դուռը բացելով` հայր եւ որդուն հայտնաբերել են կախված:

Նրանց հետ նույն շենքում ապրող բնակիչներն ասում էին, որ մինչեւ վերջերս հայրն աշխատել է: Ոչ  հավաստի տեղեկություններ ունեին, որ` որպես բանվոր: Բայց թե ինչու է հետո առանց աշխատանքի մնացել, մեր զրուցակիցները չգիտեին:

Փոքր որդին, ըստ հարեւանների, զարգացման որոշակի խնդիրներ ունի: Խեցեգործությամբ է զբաղվում, նաեւ վճարվում դրա դիմաց:

Ու թեպետ այս երեք տղամարդկանցից միայն մեկն էր աշխատում, մեր զրուցակից հարեւանների վրա նրանք ծայրահեղ աղքատի տպավորություն չեն թողել: Ասում էին` միշտ կոկիկ էին: Նաեւ` որ արտերկրում հարազատներ ունեին ու գուցե օգնություն էին ստանում:

Մեր զրուցակիցների համար տեղի ունեցածը անակնկալ էր, եւ նրանք դժվարանում էին կարծիք հայտնել, թե ինչը կարող էր հորն ու որդուն նման ծայրահեղ քայլի դրդել:

ՀՀ քննչական կոմիտեից տեղեկացանք, որ դեպքի առթիվ հարուցվել է քրեական գործ ՀՀ քրեական օրենսգրքի 110-րդ հոդվածի հատկանիշներով («Ինքնասպանության հասցնելը»): Նշանակվել է հետմահու դատահոգեբանական փորձաքննություն` պարզելու նրանց հոգեվիճակը: Դիակների արտաքին զննությամբ մահացածների վրա բռնության հետքեր չեն հայտնաբերվել:

Մեր ունեցած տեղեկություններով, սակայն, թե´ հայրը, եւ թե´ որդին հաշվառված չեն եղել հոգեբուժական որեւէ հաստատությունում: Նաեւ չեն հարել աղանդավորական ոչ մի շարժման:

Արտառոց ու սահմռկեցուցիչ այս դեպքի վերաբերյալ մեզ պարզել հաջողված  տեղեկությունների համաձայն, դուռը բացելուց հետո ոչինչ չի հուշել գողության մասին: Տղամարդիկ որեւէ մեկին չեն դիմադրել ու չեն էլ ունեցել դրա անհրաժեշտությունը: Տան դուռը, լուսամուտները մինչեւ փրկարարների ժամանելը եղել են անվնաս: Գույքը նույնպես կանոնավոր է եղել, բնակարանում` ամեն ինչ կոկիկ ու հարդարված:

Մեզ հաջողվեց պարզել, որ իրավապահների նախնական վարկածով` տղան ինքնասպանություն է գործել: Նա հիվանդ է եղել, որոշակի ժամանակ նույնիսկ բուժվել է: Բայց համարել է, որ հիվանդությունն իրականում անբուժելի է, այնինչ հարազատներն իրենից թաքցնում են դառը ճշմարտությունը: Այդ պատճառով էլ որոշել է կյանքին վերջ տալ: Իսկ հայրը, տեսնելով, որ տղան ինքնասպանություն է գործել, նույնպես դիմել է այդ քայլին:

Ավելի վաղ հայտնել ենք, որ մայիսի 10-ին Երեւանում ողբերգական դեպք է տեղի ունեցել: Ժամը 23:00-ի սահմաններում արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ է ստացվել, որ Մալաթիա-Սեբաստիա վարչական շրջանի Սվաճյան 24 շենքի 1-ին բնակարանի բնակիչները՝ հայր եւ որդի, տեւական ժամանակ է՝ չեն արձագանքում դռան եւ հեռախոսի զանգերին: Դեպքի վայր ժամանած փրկարարները, բացելով պատշգամբի, այնուհետեւ տան դուռը, բնակարանում հայտնաբերել են հոր ու որդու դիերը՝ կախված վիճակում: