Շատ ոստիկաններ քաղաքակրթվել են, իսկ քաղակտիվիստները՝ ոչ

Այստեղ մեջբերենք մեկ փաստ, ըստ որի՝ ժողովրդավարական և մարդու իրավունքների պաշտպանությամբ գլուխ գովացող ԱՄՆ-ում, ըստ պաշտոնական տվյալների, գրեթե ամեն օր 3-ից 5 մարդ է սպանվում ոստիկանների կողմից՝ լինի ավտովթար, վրաերթ, պատահականություն, հետապնդման հետևանք, ոչ դիտավորությամբ կամ նույնիսկ դիտավորությամբ պատճառված մահ: Մասնավորապես այս ամսվա ընթացքում ոստիկանների ձեռքով ԱՄՆ-ում սպանվել է 60 քաղաքացի, իսկ ընթացիկ տարվա կտրվածքով՝ 613 մարդ:Եվ կարևոր չէ, որ այդ երկիրը բավականին մեծ է: 

Ավելորդ չէր լինի նշել, որ մեր ոստիկանները վերջին ժամանակահատվածում բավական քաղաքակրթվել են, ինչը չի կարելի ասել քաղաքացիական ակտիվիստների և ընդհանրապես այս կամ այն խնդրին առնչվող բողոքի ցույցի շատ մասնակիցների մասին: Իհարկե խոսքը ոչ բոլորին է վերաբերում, բայց հիշելով վերջին ակցիների ծնունդը, թեժ ընթացքն ու սպասելի վախճանը, հասկանում ես, որ այդ գործընթացը ինչ-որ մարդկանց պետք էր, կամ այդ մարդիկ օգտվեցին առիթն իրենց շահերի իրացման տեսանկյունից: Թե ում էր դա ձեռնտու այս կոնտեքստում կարևոր չէ: Էականն այն է, որ ոստիկանությունը ողջ ընթացքում կարող էր կասեցնել ցույցը, բացել Բաղրամյան պողոտան՝ հիմք բերելով ակցիայի անօրինական լինելու հանգամանքը, բայց պետք է խոստովանենք, որ նշված գործողությունն իրականացվեց բավական կազմակերպված և առանց որևէ միջադեպի, նույնիսկ ակտիվիստները լուրջ քննադատության չենթարկեցին ոստիկանությանը:

Ժամանակն է հասկանալու, որ մենք մեկ ժողովուրդ ենք, մեկ պետություն ենք, միասնական ենք՝ լինի ոստիկան, խանութպան, բանվոր, թե՝ պաշտոնյա, պետք է հասկանանք, որ ինչ անում ենք պիտի լցվենք պատասխանատվությամբ, հանդուրժողականությամբ, չարանձնացնելով մեկի շահը մյուսից և գործենք հանուն մեր պետության մեր երեխաների պայծառ ապագայի: Այլապես, քարկոծելով և հայհոյելով միմյանց, կհասնենք միայն մեր թշնամիների նպատակների իրականացմանը: