Հղիության սեռով պայմանավորված արհեստական ընդհատումները կարգելվեն օրենքով

Հուլիսի 2-ին ՀՀ կառավարությունը հավանության արժանացրեց «Մարդու վերարտադրողական առողջության եւ վերարտադրողական իրավունքների մասին» ՀՀ օրենքում փոփոխություն կատարելու մասին», ինչպես նաեւ «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» ՀՀ օրենքների նախագծերի փաթեթը, որն արդեն ուղարկվել է Ազգային ժողով:

«Որևէ երկրում աբորտների օրենսդրական լուրջ սահմանափակումներ մտցնելը աբորտների վիճակագրության վրա որևէ էական փոփոխություն չի բերել, աբորտների թիվը դրանից չի պակասում: Պակասում են միայն անվտանգ աբորտները ու ավելանում են ոչ անվտանգ աբորտները, արդյունքում ավելանում է մայրական մահացությունը». այս մասին այսօր «Մեդիա կենտրոնում» տեղի ունեցած քննարկման ժամանակ ասաց «Մարդկային զարգացման միջազգային կենտրոնի» հետազոտությունների և զարգացման բաժնի ղեկավար Վահան Ասատրյանը:

Խոսելով հնարավոր ռիսկերի ու վտանգների մասին՝ նա, մասնավորապես, նշեց «Ես չեմ կարծում, որ այս փոփոխությամբ մենք էականորեն ոչ լիբերալ ենք դարձնում մեր օրենսդրությունը: Բայց եկեք չբացառենք, որ շատ ավելի ռադիկալ փոփոխություններ կարող են առաջարկվել, քանի որ օրենքը դեռ գտնվում է ԱԺ-ում: Պետք է թույլ չտալ էական սահմանափակումներ մտցվեն»:

Առողջապահության նախարարության մայրական և վերարտադրողական առողջության պահպանման բաժնի պետ Գայանե Ավագյանը ներկայացրեց հիմնական փոփոխությունները, որոնք առաջարկվում են օրենքի նախագծում. «Օրենքի ընդունումից հետո կինը պետք է գրավոր դիմում ներկայացնի հղիության արհեստական ընդհատում կատարելու համար, ինչը մինչ այժմ չի եղել: Նաև շատ կարևոր փոփոխություն է դիմումից հետո կնոջը 3 օր ժամանակ տրամադրելը, որը ոչ միայն ուղղված է սեռով պայմանավորված աբորտների, այլև ընդհանրապես աբորտների նվազեցմանը: Բժիշկը այդ ընթացքում պետք է տրամադրի խորհրդատվություն՝ հոգեբանական, սոցիալական, փորձի բացատրել, որ կնոջ արգանդում զարգանում է մի էակ, որը գոյության իրավունք ունի»:

Այն հարցին, թե ինչպես է վերահսկվելու օրենքի կիրառումը, Գայանե Ավագյանը պատասխանեց. «Ունենք Առողջապահության նախարարության հատուկ ստորաբաժանում՝ առողջապահական պետական տեսչություն, որի հիմնական գործառույթը օրենքի կիրառման նկատմամբ վերահսկողություն սահմանելն է»:

Խոսելով հնարավոր խախտումների ու կոռուպցիոն ռիսկերի ավելացման մասին՝ Գայանե Ավագյանն ասաց, որ դրանք չեն բացառվում, քանի որ կիրառողները մարդիկ են, բայց կան վերահսկման շատ լուրջ մեխանիզմներ. «Այստեղ մի մարդ չէ, կա վերահսկողություն բաժնի վարիչի, տնօրինության, հաշվապահության կողմից: Բացի այդ՝ բժիշկները օրենքով նախատեսված գործողությունները չկատարելու, այսինքն, եթե գրավոր չնշեն դիմումի մասին բժշկական փաստաթղթերում, չանեն խորհրդատվություն, հետաբորտային խորրդատվություն, իրենց վարչական իրավախախտման համար կտուգանվեն նվազագույն աշխատավարձի 80-100-ապատիկի չափով, ինչը, կարծում եմ, բժիշկների համար խիստ զսպանակող մեխանիզմ կլինի»:

ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը նշեց, որ անկախությունից ի վեր երկու անգամ նվազել է ծնելիությունը ու ուրախալի փաստ է, որ երեք տարում կարողացանք հասնել խնդրի առնչությամբ որոշակի գործողությունների:

Անժելա Պողոսյան

Աղբյուրը՝ Orer.am