Երեխա արդեն ունեմ, ծառեր շատ եմ տնկել, բայց իմ ձեռքերով տուն դեռ չեմ կառուցել. Սիրված հայ դերասանը նշում է 29-ամյակը

Life.panorama.am-ը գրում է . 

Դերասան Վահագն Խաչատրյանն այսօր նշում է ծննդյան 29-ամյակը: Life.panorama.am-ը դերասանի հետ զրուցել է ծննդյան օրվա անակնկալների, ամենամեծ ցանկությունների ու նոր տարիքից իր սպասելիքների մասին:

«Օրս սկսվել է ջերմ շնորհավորանքներով: Ճիշտ կեսգիշերին ինձ շնորհավորեց ընկերս՝ Արտակ Կարապետյանը, այնուհետեւ կինս, քանի որ նա նկարահանման էր: Ուրախ եմ, որ բացի մտերիմներիցս ու ծանոթներիցս, այսօր շնորհավորանքներ եմ ստացել նաեւ անծանոթ մարդկանցից, ովքեր ճանաչում են ինձ որպես դերասան ու գնահատում են իմ արվեստը»,- նշեց Վահագն ու նկատեց, որ ինչպես ամեն տարի, այս տարի եւս ծննդյան օրը կնշի մտերմիկ միջավայրում.

«Սիրում եմ, երբ ծննդյանս օրը իմ սիրելի մարդկանց կողքին եմ: Ամեն տարվա նման՝ այսօր էլ տարեդարձս կնշեմ ընտանիքիս՝ ծնողներիս, կնոջս, երեխայիս, եղբորս եւ տատիկիս հետ միասին»,- ավելացրեց օրվա հերոսը:

Անդրադառնալով դստեր շնորհավորանքին՝ Վահագնը մեծ ոգեւորությամբ պատմեց.

«Քանի որ ես աշխատանքի էի, նրան դեռ չեմ հասցրել տեսնել, բայց առավոտյան 09:00-ին Լուսինը զանգեց ու հեռախոսը փոխանցեց աղջկաս: Նա էլ իր քնաթաթախ ձայնով սկսեց երգելով շնորհավորել ինձ. հավատացեք, դա ամենաքաղցր ու տաք զգացողությունն էր: Ռուզիկի գոյությունն արդեն կյանքիս ամենամեծ նվերն է: Ի դեպ՝ արդեն մեկ շաբաթ է՝ աղջիկս անհամբեր սպասում է հայրիկի ծննդյան օրվան, ավելի ճիշտ սպասում է այսօրվա տորթին ու մոմերին, քանի որ այդ երեւույթը շատ է սիրում»:

Խոսելով երազանքներից՝ մեր զրուցակիցը նշեց.

«Իհարկե, երազանքներ շատ ունեմ, բայց դրանք մեծ չեն ու կարող են կատարվել: Երազանքներիս շարքում առաջնային տեղում է գտնվում այն, որ մեր երկրում արվեստի ոլորտը աճ ունենա: Ցավում եմ, որ արվեստն այսօր այնքան էլ բարձր մակարդակի վրա չէ: Տարիներ առաջ, երբ նկարահանվում էի նոր-նոր դուրս եկող սերիալներում, մտածում էինք, որ գնալով որակական աճ ենք ունենալու, բայց, փաստորեն, ճիշտ հակառակը տեղի ունեցավ: Այսօր քիչ մարդիկ կան, ովքեր զբաղվում են լուրջ գործով, ու այդ լուրջ գործն էլ, ցավոք, պահանջարկ չունի: Այս խնդիրը գալիս է նրանից, որ այդ լուրջ գործերի նկատմամբ չկա պետական վերաբերմունք: Ճիշտ է՝ նախարար փոխվեց ու գուցե ինչ-որ բան փոխվի: Ես շատ եմ սիրում թատրոնն ու արվեստն առհասարակ, իմ մասնագիտությունից երբեք չեմ հոգնում ու հաճույքով եմ աշխատում, մնում է, որ լինի համապատասխան վերաբերմունք: Հիմա իմ մեջ մեծ բացթողում եմ զգում իմ մասնագիտության առումով, Այսօր մեր ոլորտում պակասում են լուրջ ռեժիսորական, սցենարական ու դերասանական աշխատանքները»:

«Իսկական տղամարդը պետք է ծառ տնկի, տուն կառուցի ու երեխաներ ունենա»՝ հայտնի ասույթի երկու կանոնը Վահագն արդեն կատարել է, մնում է մեկը.

«Երեխա արդեն ունեմ, ծառեր շատ եմ տնկել, բայց իմ ձեռքերով տուն դեռ չեմ կառուցել, սակայն դա կիրականանա շատ մոտ ապագայում: Այս պահին իմ բոլոր ռեսուրսները աշխատում եմ ներդնել դրա մեջ»,- նշեց նա:

29-ամյա դերասանը փոքր-ինչ տխրում է, որ տարիներն արագ են անցնում, բայց նաեւ գնահատում է ունեցած ամեն բան.

«20-ների շրջանում շատ բան եմ հասցրել անել՝ սովորել եմ, այս ընթացքում իմ կյանքում եղել են ինտերակտիվ թատրոնի, մնջախաղի թատրոնի, կամերային թատրոնի ժամանակաշրջաններ, շատ ճանապարհորդություններ ու փառատոններ եմ ունեցել, նաեւ լավ աշխատակազմ եմ ունեցել, ինչի համար կրկին ուրախ եմ: Ես գոհ եմ 20-ների շրջանից, քանի որ այդ ընթացքում նաեւ ընտանիք եմ կազմել ու երեխա ունեցել: Վստահ եմ այս տարի էլ նոր ձեռքբերումներ կունենամ ու լավ կավարտեմ կյանքիս երկրորդ տասնամյակը եւ նույն հաջողությամբ մուտք կգործեմ երրորդ տասնամյակ»,- նշեց Վահագնը:

Ի դեպ՝ մեզ հետ զրույցի վերջում, մարտի 8-ին ընդառաջ, Վահագնը իր շնորհավորանքը հղեց.

«Այսօր ինձ են շնորհավորում, վաղը՝ ես: Հաճելի է, որ ամեն տարի տարեդարձիս հաջորդ օրը կապի մեջ եմ լինում հորաքույրներիս ու մորաքույրներս հետ: Շնորհավորում եմ բոլոր մայրերին, կանանց, աղջիկներին, ցանկանում եմ, որ միշտ լինեն կանացի, գեղեցիկ, առույգ ու սիրված: Շնորհավորում եմ նաեւ կնոջս տոնը ու ցանկանում եմ, որ նա միշտ լինի գեղեցիկ եւ իմ կողքին: Ամենակարեւորը շնորհավորում եմ իմ չքնաղ աղջկան, նրան շատ եմ սիրում: Ուզում եմ, որ նա առողջ մեծանա եւ դառնա ինտելեկտով հարուստ ու երջանիկ աղջիկ»:

Հեղինակ՝ Անուշիկ Մելքոնյան