Անկարան շարունակում է Բեռլինին վերջնագրեր ներկայացնել

Թուրքիայի վարչապետ Բինալի Յըլդըրըմը Գերմանիային կոչ է արել կողմնորոշվել՝ ընտրում է «Թուրքիայի հետ բարեկամությո՞ւնը», թե՞ «խռովարարներին աջակցությունը»: «Խռովությանը մասնակցած զինվորներին ապաստան տալու Գերմանիայի որոշումը կարեւոր նշաձող է, որը մեր հարաբերությունների համար անհետեւանք չի մնա»,- հայտարարել է նա՝ թուրքական հեռուստատեսությանը տված մեկնաբանության մեջ, փոխանցում է DW-ն:

Մայիսի սկզբին հայտնի է դարձել, որ Գերմանիան առաջին անգամ ապաստան է տրամադրել մի քանի թուրք զինծառայողների եւ նրանց ընտանիքների անդամներին: Գերմանական լրատվամիջոցների տեղեկություններով՝  խոսքը զինվորականների մասին է, որոնք թուրքական բանակից հեռացվելուց հետո եղել են Գերմանիայում տեղակայված ՆԱՏՕ-ի ուժերի կազմում:

2016 թվականի հուլիսին Թուրքիայում պետական հեղաշրջման փորձից մինչեւ 2017-ի մայիսի սկիզբ ընկած ժամանակահատվածում Գերմանիայի իշխանությունները քաղաքական ապաստան տրամադրելու հայց են ստացել 414 թուրք զինծառայողներից, դիվանագետներից, դատավորներից եւ այլ բարձրաստիճան պետական ծառայողներից ու նրանց ընտանիքների անդամներից, հայտնում են լրատվամիջոցները՝ վկայակոչելով Գերմանիայի ՆԳՆ-ում աղբյուրներին:

Մայիսի 15-ին Թուրքիան Գերմանիայի Բունդեսթագի պատգամավորների խմբին թույլ չի տվել այցելել Ինջիրլիք ռազմաօդային բազայում տեղակայված գերմանացի զինվորներին: Բազայում տեղակայված է մոտ 260 գերմանացի զինվոր: Նրանք աջակցում են Սիրիայում եւ Իրաքում «Իսլամական պետություն» ջիհադական խմբավորման բազաներին հասցվող օդային հարվածներին՝ իրականացնելով օդային հետախուզում եւ օդանավերի լիցքավորում: