Հայտնի է Ժիրայր Սեֆիլյանի գործով դատական նիստի առաջին օրը . նիստն արտագնա կլինի

Հայտնի է Ժիրայր Սեֆիլյանի գործով դատական նիստի առաջին օրը:

NEWS.am-ը Դատական տեղեկատվական համակարգից տեղեկացավ, որ առաջին նիստը կկայանա մայիսի 26-ին ժամը 12,30-ին: Չնայած գործն ուղարկվել է Աջափնյակ եւ Դավթաշեն վարչական շրջանների ընդհանուր իրավասության դատարան, նիստը կկայանա Շենգավիթ վարչական շրջանի ընդհանուր իրավասության դատարանում: Թե ինչու է նիստն արտագնա, դեռեւս հայտնի չէ:

Դատավորն է Տաթեւիկ Գրիգորյանը:

Ըստ մեղադրանքի Ժիրայր Սեֆիլյանը 2015թ. ապրիլի 24-ին Երևանում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցիչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, սկսած 2014 թվականի մայիսից կատարել է դրա կազմակերպմանն ուղղված նախապատրաստական գործողություններ: Բացի դրանից, 2015թ. նոյեմբերից մինչեւ 2016թ. մայիսի 18-ն ընկած ժամանակահատվածում, կազմակերպված խմբի կազմում ապօրինին կերպով ձեռք է բերել, պահել և փոխադրել հրազեն և ռազմամթերք, նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել և պահել ռազմավարական նշանակության շենքեր, շինություններ, սակայն իր կամքից անկախ հանգանամքներով ավարտին չի հասցվել:

Այս գործի շրջանակում մեղադրանք է առաջադրված նաեւ Գեւորգ Սաֆարյանին: Ըստ մեղադրական եզրակացության՝ 2015թ. ապրիլի 24-ին Երևանում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցիչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, սկսած 2014 թվականի մայիսից կատարել է դրա կազմակերպմանն ուղղված նախապատրաստական գործողություններ:

Հրայր Թոփչյանին էլ մեղադրանք է առաջադրվել Սեֆիլյանի կողմից ստեղծված, զինված կազմակերպված խմբի կազմում հրազեն եւ ռազմամթերք ապօրինի պահելու եւ փոխադրելու մեջ: Հրայր Թոփչյանը, ըստ մեղադրանքի, գիտակցելով կամովին հրաժարվել է հանցագործության նախապատրաստությունից և անմիջականորեն հանցանք կատարելուն ուղղված գործողություններից, հրազեններն ու ռազմամթերքը Ժիրայր Սեֆիլյանին վերադարձնելու ժամանակ ենթարկվել է ավտովթարի, բացահայտվել ու բերման ենթարկվել ոստիկանության բաժին:

Սասունիկ Կիրակոսյանը, Հովհաննես Պետրոսյանն ու Գալուստ Գրիգորյանը նույնպես կամովին հրաժարվել են հանցագործության նախապատրաստությունից և անմիջականորեն հանցանք կատարելուն ուղղված գործողություններից:

Ժիրայր Սեֆիլյանին մեղադրանք է առաջադրվել Քրեական օրենսգրքի 35-225-րդ հոդվածի 1-ին մասով, 35-219-րդ հոդվածի 3-րդ մասի 1-ին կետով: Նա կալանավորված է:

Նշենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Սեֆիլյանին սպառնում է մինչեւ 18 տարվա ազատազրկում: