Հայաստանին ընտրատեղամասերից դուրս ժողովրդավարական կոնսոլիդացիա է անհրաժեշտ. Եվրոպայի խորհուրդ

Եվրոպայի խորհրդի տեղական ու տարածաշրջանային կոնգրեսի ընտրությունների անցկացման փորձագետների խումբը, որը գլխավորում է Լիիսա Անսալան ավարտել է Երեւանի ավագանում ընտրություններում դիտորդական առաքելությունը։ Այս մասին ասվում է կազմակերպության տարածած հայտարարությունում։

2016 թվականի փոփոխված  ընտրական օրենսգրքի համաձայն տեղի ունեցած քվեարկության ժամանակ երկրորդ անգամ օգտագործվել են ընտրողների անձը ստուգող սարքավորումները (VAD)՝ ապրիլի 2-ի խորհրդարանական ընտրություններից հետո, ինչը Կոնգրեսին թույլ է տվել գնահատել ինչպես նոր իրավական շրջանակի իրացումը, այնպես էլ ընտրողների նույնականացման էլեկտրոնային համակարգն ու ավազակությունները կանխելը։ 

Ընտրությունների օրը Կոնգրեսի 4 խմբեր տարբեր վարչական շրջաններում այցելել են մոտ 100 ընտրատեղամասեր, որտեղ քվեարկության ամբողջ ընթացքում անխափան գործել են վերոնշյալ սարքավորումները։

«Փոփոխված Ընտրական օրենսգիրքն ու տեխնիկական միջոցներն, անխոս, բարելավել են իրավիճակն ընտրատեղամասերի ներսում։ Այնուամենայնիվ, հետագա ժողովրդավարական կոնսոլիդացիան անհրաժեշտ է նաեւ տեղամասերից դուրս։ Ինչպես ապրիլի 2-ի խորհրդարանական ընտրությունների ժամանակ՝ Երեւանում ընտրությունների ընթացքում եւս մեր պատվիրակությունը ընտրակաշառքների ու կաշառակերության մասին պնդումներ է լսել։ Բացի այդ, գոյություն ունի պետական ծառայողների վրա ճնշում գործադրելու ու վարչական ռեսուրսների չարաշահման խնդիրը։ Հիմնական վայրերում, որտեղ այցելել են մեր ներկայացուցիչները, ընտրատեղամաերի շուրջ կուտակված մարդկանց խմբեր են եղել՝ քվեարկության վերահսկելիության ընդհանուր մթոնոլորտ ստեղծելով։ Դա վերաբերում է նաեւ մարդկանց ընտրատեղամասեր տեղափոխող ավտոբուսներին։ Իշխանությունները պետք է լրջորեն վերաբերվեն այս բոլոր հարցերին, որպեսզի բարձրացնեն վստահությունն ընտրությունների ու վարչակազմի նկատմամբ առհասարակ», - հայտարարել է Կոնգրեսի փոխնախագահ Լիիսա Անսալան։

Նրա խոսքով՝ այն փաստը, որ ընտրություններին մասնակցել է ընտրողների 40 տոկոսը, ահազանգ է ու վկայում է  քաղաքական ապատիայի բարձր մակարդակի եւ քաղաքական համակարգին չվստահելու մասին։