Շուշանիկ Բախշյանը չի ուզում ցուցմունք տալ. փաստաբան

Ծննդկան Մերի Մարգարյանի եւ նորածնի մահվան մեջ մեղադրվող՝ «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանն ամենայն հավանականությամբ ցուցմունք չի տալու:

Այսօր՝ մայիսի 23-ին, Երեւանի «Շենգավիթ» վարչական շրջանի ընդհանուր իրավասության դատարանում Շուշանիկ Բախշյանի փաստաբան Ալեքսանդր Սիրունյանը հայտարարեց, որ իր պաշտպանյալը չի ուզում ցուցմունք տալ:

Դատավոր Դավիթ Բալայանը որոշեց հաջորդ դատական նիստին հարցաքննել մյուս ամբաստանյալին՝ Անի Բաբելյանին, որը համաձայնվեց:

Հաջորդ դատական նիստը նշանակվեց հունիսի 13-ին:

Նշենք, որ Շուշանիկ Բախշյանը մինչեւ այս դատարանում որեւէ դիրքորոշում չի հայտնել: Այսօր, սակայն, երբ հարցաքննվում էր դատաբժշկական հանձնաժողովային փորձաքննության հանձնաժողովի նախագահ Գագիկ Հարությունյանը, որը բավականին կոշտ արտահայտվեց «Շենգավիթ» ԲԿ-ի մասնագետների գործողությունների վերաբերյալ, Շուշանիկ Բախշյանը հայտարարեց, որ ինքը հուլիսի 27-ին Մերի Մարգարյանին կեսարյան հատում անելու որեւէ հիմնավորում չի ունեցել:

Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015թ. հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։ Հաջորդ օրը հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: Հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» ԲԿ-ում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից հուլիսի 29-ին Մերի Մարգարյանը մահացել է, իսկ հաջորդ օրը մահացել է նաեւ նրա նորածին դուստրը:

Այս գործով երկու մեղադրյալ կա՝ «Շենգավիթ» ԲԿ-ի բժշկուհիներ Շուշանիկ Բախշյանն ու Անի Բաբելյանը: