Հրապարակավ ասել եմ շատ բան. Գեւորգ Պետրոսյանը հաշտվել է Նաիրա Զոհրաբյանի հետ

Գագիկ Ծառուկյանը ներդրում ունեցել է Գեւորգ Պետրոսյանի եւ Նաիրա Զոհրաբյանի հաշտեցման գործում: Այս մասին, այսօր՝ մայիսի 31-ին, ԱԺ-ում լրագրողների հետ զրույցում նշել է «Ծառուկյան» դաշինքի ցուցակով թիվ 1 ընտրական տարածքից պատգամավոր ընտրված Գեւորգ Պետրոսյանը՝ անդրադառնալով իր եւ Նաիրա Զոհրաբյանի միջեւ եղած լարված հարաբերություններին:

«Մեր միջեւ անձնական որեւէ թշնամություն, հակակրանք չի եղել եւ չկա: Մենք աշխատանքային գործընկերներ ենք, ես ԱԺ եմ գալիս իմ պատգամավորական գործառույթները ծավալելու համար: Հրապարակավ ասել եմ շատ բան, եւ հրապարակավ նաեւ նշել եմ, որ մեր հարաբերությունները հարթվել են: Ինչո՞ւ եք դուք շահագրգռված որ ինտրիգ լինի այս ամենի մեջ: Դուք որպես այս երկրի քաղաքացիներ պետք է խրախուսեք ցանկացած հաշտություն, այդ թվում նաեւ քաղաքական ուժերի ներկայացուցիչների միջեւ»,-ընդգծեց Պետրոսյանը:

Լրագրողների հիշեցմանը, որ ժամանակին Աշխատանքի եւ սոցիալական հարցերի նախարարի պաշտոնից ազատվեց նշանակումից 6 ամիս անց, հնարավո՞ր է դա կրկնվի օրենսդրական գործունեության ընթացքում, նորընտիր պատգամավորը պատասխանեց. «Ես իմ գործառույթներն իրականացնելու եմ օրենքի տառին համապատասխան եւ եթե իմ քաղաքական ղեկավարությունը գոհ լինի իմ աշխատանքից, ես ինչու պետք է հրաժարական տամ»:

Ինչ վերաբերում է նրան, որ նույն ընտրական տարածքում մի շարք թեկնածուներ ինքնաբացարկ են հայտնել, որպեսզի ինքը դառնա պատգամավոր, Գեւորգ Պետրոսյանն ասաց. «Մանդատից հրաժարվելը պատգամավորի սահմանադրական իրավունքն է, մարդն օգտվել է իր իրավունքից: Ոչ մի բան ոչ մեկի կամքին հակառակ չի եղել»:

Հիշեցնենք, որ ԲՀԿ նախագահի լիազորություններն ստանձնելուց հետո Նաիրա Զոհրաբյանը կուսակցությունից հեռացրել էր Գեւորգ Պետրոսյանին՝ իրեն քննադատելու համար: Գեւորգ Պետրոսյանը դա համարում էր անօրինական որոշում եւ սպառնում էր դատի տալ Նաիրա Զոհրաբյանին: Նրանց հարաբերությունները խիստ լարված էին եւ անգամ մամուլում նրանք վիրավորանքի խոսքեր էին հնչեցնում միմյանց հասցեին :