Կառավարությունը կգնա մարզեր , բայց ոչ ամբողջ կազմով

ՀՀ Կառավարության այսօրվա նիստը մեկնարկեց վարչապետ Կարեն Կարապետյանի հերթական հանձնարարականներով: Կարապետյանի առաջին հանձնարարականն ուղղված էր մարզպետներին: «Բազմիցս նշել ենք, որ մեր կողմից իրականացվող գործողությունները եւ միջոցառումները պետք է հանգեցնեն յուրաքանչյուր ոլորտում կիրառական եւ շոշափելի արդյունքների: Միաժամանակ մեր կողմից արձանագրվել է համայնքների եւ մարզերի զարգացման ծրագրերի կարեւորությունը: Ակնհայտ է, որ կա ծրագրի իրականացման եւ խնդիրների բարձրացման լրացուցիչ խորհրդակցությունների անհրաժեշտություն»,- նշեց Կարեն Կարապետյանը:

Հաշվի առնելով վերոնշյալը՝ նա  մարզպետներին հանձնարարեց 20 օրյա ժամկետում Կառավարության աշխատակազմ ներկայացնել տեղեկատվություն 2017 թվականի ընթացքում ըստ ոլորտների իրականացված միջոցառումների հետեւենաքով արձանագրված կոնկրետ գործողությունների վերաբերյալ, որոնք դրական ազդեցություն են ունեցել քաղաքացիների իրավունքների պաշտպանության, նվազեցրել են վարչարարությունը, նպաստել են բիզնես միջավայրի բարելավմանը: «Երկրորդը` ՀՀ Կառավարության աշխատակազմի ղեկավար- նախարարի պաշտոնակատարին, ՀՀ տարածքային կառավարման եւ զարգացման նախարարին, ՀՀ մարզպետներին մեկշաբաթյա ժամկետում ներկայացնել ժամանակացույց պաշտոնատարա անձանց ցանկը, օրակարագը մարզերում ըստ մարզային անհրաժեշտությունների եւ քննարկման ենթակա խնդիրների հրատապության, ընդլայնված կազմով խորհրդակցություննների կազմակերպման համար»,- նշեց վարչապետը:

Ըստ Կարապետյանի՝ սա պայմանավորված է այն հանգամանքով, որ յուրաքանչյուր գերատեսչություն, մարզային իշխանություն պետք է հաշվետվություն ներկայացնի կատարած աշխատանքների վերաբերյալ: Նա առաջարկեց կառավարության նիստի նման մի բան անցկացնել մարզերում: Այն չի լինելու կառավարության արտահերթ նիստ, որովհետեւ կարիք չկա, որ բոլորը գնան մարզեր: Նիստին կմասնակցեն միայն շահագրգիռ կողմերը: