Առանց խելամիտ փոխզիջումների հնարավոր չէ հասնել ԼՂ խնդրի լուծման. Շարմազանո

Առանց խելամիտ փոխզիջումների հնարավոր չէ հասնել հիմնախնդրի լուծմանը, մինչդեռ Ադրբեջանը մինչ օրս պատրաստ չէ այդ փոխզիջումներին: Այս մասին, այսօր՝ հունիսի 7-ին, Հայաստանում Ղազախստանի Հանրապետության արտակարգ եւ լիազոր դեսպան Թիմուր Ուրազաեւի հետ հանդիպման ժամանակ նշել է ՀՀ ԱԺ փոխնախագահ Էդուարդ Շարմազանովը:

ԱԺ-ից NEWS.am-ին հայտնում են, որ հանդիպման ընթացքում կողմերն անդրադարձել են տարածաշրջանում տիրող իրավիճակին` կարեւորելով կայունությունն ու խաղաղությունը տարածաշրջանի երկրներում:

ՀՀ ԱԺ փոխնախագահը, դրական գնահատելով հայ-ղազախական ներկա հարաբերությունները, կարեւորել է միջխորհրդարանական կապերի հետագա զարգացումը եւ այդ հարցում բարեկամական խմբերի դերը: Այս համատեքստում Շարմազանովը նշել է, որ առաջիկայում վեցերորդ գումարման խորհրդարանում կձեւավորվի Հայաստան-Ղազախստան բարեկամական խումբ եւ վստահեցրել, որ այն առանցքային նշանակություն կունենա հայ-ղազախական խորհրդարանական համագործակցության հետագա զարգացման գործում:

ՀՀ ԱԺ փոխնախագահն անդրադարձել է ԼՂ հակամարտության կարգավորմանը եւ ընդգծել, որ եւ՛ Հայաստանը, եւ՛ Արցախը խնդրի կարգավորումը տեսնում են բացառապես խաղաղ բանակցային ճանապարհով:

«Առանց խելամիտ փոխզիջումների, սակայն, հնարավոր չէ հասնել հիմնախնդրի լուծմանը, մինչդեռ Ադրբեջանը մինչ օրս պատրաստ չէ այդ փոխզիջումներին»,- ընդգծել է Էդուարդ Շարմազանովը:

Նա տարածաշրջանային անվտանգության համատեքստում անդրադարձել է Թուրքիայի կողմից Հայաստանի հետ սահմանը փակելու խնդրին եւ անթույլատրելի համարել 21-րդ դարում փակ սահմաններ ունենալը: Նրա համոզմամբ՝ դա լուրջ սպառնալիք է տարածաշրջանի համար:

ՀՀ ԱԺ փոխնախագահը կարեւորել է համագործակցությունը միջազգային կառույցներում՝ ԱՊՀ ՄԽՎ-ում, ՀԱՊԿ ԽՎ-ում՝ երկու երկրների խորհրդարանական պատվիրակությունների աշխատանքն այդ հարթակներում որակելով կառուցողական: Նրա գնահատմամբ՝ ԵՏՄ անդամակցությունը երկու երկրների տնտեսական կապերի զարգացման նոր հնարավորություններ է ստեղծում:

Դեսպանը բարձր է գնահատել խորհրդարանականների ներդրումը միջպետական հարաբերությունների զարգացման գործընթացում: Նա եւս կարեւորել է միջխորհրդարանական հարթակներում երկկողմ հետաքրքրություն ներկայացնող հարցերի շուրջ պատվիրակությունների սերտ համագործակցությունը:

Պարոն Ուրազաեւը եւս մեկ անգամ վերահաստատել է, որ Ղազախստանը, ԼՂ հիմնախնդրի խաղաղ կարգավորման կողմնակից լինելով, աջակցում է ԵԱՀԿ Մինսկի խմբի գործունեությանը:

Թիմուր Ուրազաեւը, խոսելով ապրիլին մեր երկրում տեղի ունեցած խորհրդարանական ընտրությունների մասին, նշել է, որ Ղազախստանից այցելած դիտորդները բարձր են գնահատել Հայաստանում անցկացված ընտրությունները:

Քննարկվել են նաեւ Ղազախստանում հայկական համայնքի գործունեությանը վերաբերող հարցեր: Դեսպանը վստահեցրել է, որ հայերն ակտիվ ներգրավված են Ղազախստանի հասարակական եւ քաղաքական կյանքում: