Ըստ փոփոխված Սահմանադրության՝ Հանրապետականը միշտ պետք է իշխի

«Չեք անցկացնի» քաղաքացիական նախաձեռնությունը քննարկեց նախագահին առընթեր մասնագիտական հանձնաժողովի կողմից առաջարկվող սահմանադրական փոփոխությունների դեմ քայլերը,- հայտնում է  Orer.am-ը։

Ինչպես նշեց շարժման ներկայացուցիչ Արմեն Գրիգորյանը` նախագիծը պարզապես սահմանում է, որ Հանրապետականը միշտ պետք է իշխի Հայաստանում.

«Ամեն ինչ պարզից էլ պարզ է: Ստեղծված վիճակը ձեռնտու է իշխանություններին: Դա գործընթացի հենց սկզբից էլ պարզ էր. այն վերարտադրության Սահմանադրություն է, դա ՀՀԿ-ի և Սերժ Սարգսյանի համար գրված Սահմանադրություն է, որպեսզի կարողանան իշխանությունը պահպանել։

Հենց սկզբից էլ պարզ էր դառնում, որ Սերժ Սարգսյանը ցանկություն չունի սահմանադրական փոփոխություններ կատարել՝ երկիրը բարելավելու, ժողովրդավարական ճանապարհով տանելու համար»։

Նա նաեւ հավելեց, որ Հայաստանը վերցրել է Իտալիայի օրինակը. «Նրանք վերցրել են Իտալիայի օրինակը, մինչդեռ Իտալիայում 2015 թվականի մայիսին է ընդունվել, ուժի մեջ է մտնելու մյուս տարվանից, ու օրենսդրական մակարդակում է դա նշված։ Իտալիան դրա որևիցե պրակտիկա չունի, այսինքն` վերցրել են մի մոդել, որպեսզի իշխանությունը ուժեղացնեն ու ավելի ավտորիտար ռեժիմ ստեղծեն»:

Նշենք, որ «Չեք անցկացնի» քաղաքացիական նախաձեռնությունը սահմանադրական փոփոխությունները համարում է խիստ վտանգավոր։

Սոսե Չանդոյան