Ադրբեջանը սպասում է Ռուսաստանի կամ Թուրքիայի թելադրանքին. Մանվել Եղիազարյան. Orer.am

Orer.am-ը գրում է.

Մայիսի 9-ին ողջ հայ ազգը մեծ շուքով եւ եռանդով նշեց մայիսյան եռատոնը` Հայրենական մեծ պատերազմում տարած հաղթանակի 70-րդ տարեդարձը, Լեռնային Ղարաբաղի Հանրապետության պաշտպանության բանակի և Շուշիի ազատագրման 23-ամյակը։
Նկատենք, որ մինչ մայիսյան տոները ռազմական փորձագետները եւ Արցախյան ազատամարտի մասնակիցները կոչ էին անում սահմանը պահող հայ զինվորին լինել էլ ավելի ուշադիր եւ զգոն, քանզի մեկ անգամ չէ, որ հայերիս համար կարեւոր եւ նշանավոր օրերին` հատկապես տոների ժամանակ, ադրբեջանական բանակը բացահայտ կերպով խախտել է հրադադարի ռեժիմը եւ իրականացրել դիվերսիոն հարձակումներ:

Որքան էլ որ զարմանալի է, այնուամենայնիվ, մայիսյան տոների ժամանակ ադրբեջանական կողմը ընգծված կերպով չդիմեց իր ստոր գործելաոճին: Թե տակտիկական ինչ քայլերի է դիմում Ադրբեջանը, Orer.am-ը ճշտեց «Արաբո» ջոկատի հրամանատար Մանվել Եղիազարյանից.

«Ադրբեջանի կողմից տակտիկական ոչ մի քայլ էլ չի արվում: Ասեմ, որ Իլհամ Ալիեւն ինքնուրույն քաղաքականություն չի վարում, որ որոշի կրակի, թե չկրակի մեր ուղղությամբ: Ես կարծում եմ, որ այս պահին Ալիեւին պարզապես հրահանգված է դադար տալ` հասկանալու համար, թե ինչ է լինելու եւ ինչ լուծումներ են տրվելու հարցերին: Նրանք սպասում են Ռուսաստանի կամ Թուրքիայի թելադրանքին»:

Անդրադառնալով Ալիեւի կոչերին եւ հայկական կողմի արձագանքին` Մանվել Եղիազարյանը նկատեց, որ որքան բարձր է լինում որոշների կողմից կոչի հնչեղությունը, այնքան ավելի բարձր է լինում նմանների հեղինակությունը, սակայն պատերազմական իրավիճակներում այդ մարդիկ լավ են գտնում այն բոլոր տաքուկ անկյունները, որոնցում հնարավոր է լինում թաքնվել.

«Դուք երեւի նկատել եք, որ այն մարդիկ, ովքեր չեն մասնակցել պատերազմին, հարկ եղած դեպքում մեծ-մեծ են խոսում: Այդ մարդիկ ոգեւորվում են այն ժամանակ, երբ ուրիշների արածը վերագրում են իրենց: Ալիեւը գիտի, որ ինքը չի գնալու կռիվ, գիտի, որ հասարակ ժողովուրդն է կռիվ տալու ու գնալու մահի բերան: Նշեմ, որ Ալիեւը կռիվ չի գնա, ինչպես մեր իշխանավորներից շատերը, որոնք կռվի ժամանակ թաքնվեցին ու այսօր պատմություն են կեղծում, ազգային ոգին են փշրում:

Այսօրվա դրությամբ արվում է ամեն ինչ, որ մարդիկ ատեն պայքարը: Իսկ նման կոչ անող մարդիկ, երբ խոսում են պատերազմի մասին, հասկանում ես, թե որ պահն է նա հնարում, քանի որ ինքդ եղել ես դրա մեջ». նշեց հրամանատարը:

Սոսե Չանդոյան