Մանրամասներ «Սուպեր մամա 2» ֆիլմից

ARMTIMES.com / Առաջիկա մոտ մեկուկես ամսվա ընթացքում ընթանալու են «Սուպեր մամա 2» կատակերգության նկարահանումները: Աշխատանքները սկսվել են հունիսի 1-ին: Ֆիլմը պետք է նկարահանվեր դեռ 2016-ին, սակայն ստեղծագործական անձնակազմն ապրիլյան քառօրյա պատերազմից հետո կատակերգական ֆիլմ նկարահանելը նպատակահարմար չհամարեց: Սցենարային աշխատանքներն ու դերասանների ընտրությունն արված էին դեռ մինչեւ պատերազմը, իսկ նկարահանումները պետք է լինեին ամռանը, սակայն հետաձգվեցին: Armtimes.com-ի հետ զրույցում գլխավոր պրոդյուսեր եւ դերակատար Հայկ Մարությանը որոշ մանրամասներ հայտնեց սյուժեից՝ հիմնական մասը փորձելով թաքցնել:

«Ուղղակի կարող եմ ասել, որ նույն ընտանիքի պատմությունն է 5 տարի անց, եւ Կարենը՝ գլխավոր կերպարը, որը 1-ին ֆիլմում խոսք էր տվել, որ այլեւս նախկինի պես չի ապրելու, եւ մտել էր նորմալ կյանքի հունի մեջ, այս ֆիլմում նորից հագնում է կանացի շորերը եւ կանացի կերպարանքի է անցնում, որպեսզի փրկի իր կնոջը, որը շատ դժվար իրավիճակի մեջ է ընկնում»,- պատմեց նա:

Ֆիլմի անձնակազմը փորձել է գաղտնի պահել նաեւ շոումեն, «Comedy Club»-ի հիմնադիր-անդամ Գարիկ Մարտիրոսյանի մասնակցությունը, սակայն չի ստացվել: Դերասանին նկատել են նկարահանումներից մեկի ժամանակ «Դալմա Գարդեն Մոլում»: Նա ֆիլմի հատուկ հյուրն է եւ հանդես է գալու ոչ այնքան մեծ դերով:

«Չեմ ասի, որ Գարիկի դերը մեծ է, շատ մեծ չէ, բայց շատ հետաքրքիր է: Չեմ ցանկանում փակագծեր բացել, միայն նշեմ, որ կերպարը կարմիրգծային է, կարմիր գիծ կա ֆիլմում, որը նրա հետ է կապված: Այդքանը կասեմ, մնացածը թող անակնկալ լինի: Նրա մասնակցությունն ընդհանրապես չպետք է հայտնի լիներ, բայց Հայաստանում շատ դժվար է գաղտնիքներ պահել (ծիծաղում է)»,- ասաց Հայկը:

Ֆիլմը հեռուստատեսությամբ չի ցուցադրվելու: Այն ստեղծողները եւ դիստրիբուցիոն ընկերությունը նման համաձայնության են եկել, քանի որ հակառակ դեպքում, տուժում է կինոարտադրությունը: Հայկ Մարությանը պարզաբանում է, որ վերջին տարիներին հայկական կինոարտադրությունն իսկապես աղետալի վիճակում է, քանի որ մարդիկ սպասում են, որ ֆիլմը ցուցադրվի հեռուստաալիքներով եւ կինոթատրոններ չեն գնում, իսկ հայկական ֆիլմերի սպառման շուկան միայն Հայաստանն է, եւ եթե մարդիկ կինոթատրոններ չեն գնում, ֆիլմերը ստեղծողները եկամուտ չեն ստանում. ոչ աշխատավարձ են ունենում, ոչ էլ առհասարակ այլ ֆիլմի վրա աշխատելու գումար:

«Այս վերջին 2 տարվա ընթացքում մոտ 15 ֆիլմ է նկարահանվել: 15-ից 13-ը նույնիսկ իրենց ծախսած գումարը հետ չեն բերել: Այն 2 ֆիլմերից մեկը մենք ենք եղել («Սիրո գործակից»), որ գումար աշխատել ենք, մեկն էլ միայն ծախսերն է հետ բերել ու վերջ, գումար չի աշխատել: Եթե հաշվի ես առնում վաստակած գումարն ու տարիների աշխատանքը, որ տարվել է ֆիլմի վրա, ֆիլմարտադրությունը կոմերցիոն տեսանկյունից անհետաքրքիր է դառնում: Մարդիկ, բնականաբար, լավ օրից չէ, որ ասում են՝ դե հեռուստատեսությամբ կնայենք, բայց ինձ թվում է՝ շատուշատ մարդիկ, որոնք հնարավորություն ունեն կինոթատրոններում դիտելու, արդեն իրենք էլ են ասում՝ լավ հեռուստատեսությամբ կնայենք»,- ասաց նա՝ ավելացնելով, որ ֆիլմը հեռուստատեսությամբ չի ցուցադրվելու առաջիկա տարիներին, սակայն երբեւիցե հնարավոր է՝ լինի:

2014 թ.-ին էկրան բարձրացած «Սուպեր մամա»-ի դերասանական անձնակազմը պահպանվել է: Նախորդ ֆիլմում գլխավոր դերերում հանդես են եկել Հայկ Մարությանը, Անի Խաչիկյանը, Գարիկ Պապոյանը, Արման Մարտիրոսյանը, Լեւոն Հարությունյանը, Արմինե Պողոսյանը, Արփինե Գաբրիելյանը եւ ուրիշներ: 2-րդ մասում նրանց են միացել Լիլի Էլբակյանը, Արսինե Նավասարդյանը, Էվա Խաչատրյանը, Հրաչ Մուրադյանը, Սեպուհ Ապիկյանը, Իշխան Ղարիբյանը, Ելենա Եսայանը եւ այլն: Ֆիլմի բեմադրող ռեժիսորներն են Արման Մարությանը եւ Վահագն Խաչատրյանը, բեմադրող օպերատորը՝ Մկրտիչ Բարոյանը: Պրոդյուսերը Սերգեյ Հարությունյանն է:

«Սուպեր մամա 2»-ի նկարահանումները տեղի են ունենում հիմնականում Երեւանում եւ հատուկ ստեղծված տաղավարներում: Պրեմիերան կլինի սեպտեմբերի վերջին: Ցուցադրություններ են լինելու նաեւ սահմանամերձ շրջաններում: