Որոնք են մեջքի ցավի հիմնական պատճառները

Սովորաբար մեջքի ցավերի դեպքում մարդիկ մտածում են, որ խնդիրը պայմանավորված է օստեոխոնդրոզով, ռադիկուլիտով կամ որևէ այլ անվնաս, բայց ցավոտ հիվանդությամբ: Սակայն հարկ է հիշել, որ ցանկացած խնդրի դեպքում անհրաժեշտ է հստակ պարզել դրա պատճառը:

Տարիների ընթացքում մարդու ողնաշարը «մաշվում» է և չի կարողանում դիմակայել այն ծանրաբեռնվածությանը, որը նախկինում սովորական էր: Բժիշկների խոսքով՝ օստեոխոնդրոզն, ըստ էության, հիվանդություն չէ, այլ հյուսվածքների մորֆոլոգիայի փոփոխություն:

Ստորև ներկայացված նկարում պատկերված է, թե ինչ փոփոխությունների է ենթարկվում ողնաշարը տարիների ընթացքում:

Առաջին նկարում պատկերված են առողջ ողեր և առաձգական միջողային սկավառակ: Երկրորդ նկարում միջողային սկավառակը բորբոքված է, իսկ դրա չափերը փոքրացած են: Երրորդ նկարում պարզ երևում են նոր ի հայտ եկող դեգեներատիվ փոփոխությունները: Վերջին՝ չորրորդ նկարում միջողային սկավառակն արդեն չի երևում, սակայն երևում են գերաճած ոսկրային հյուսվածքները:

Այս ամենից կարելի է եզրակացնել, որ ողնաշարը հնարավոր չէ երիտասարդացնել, սակայն կարելի է կատարել որոշ գործողություններ, որոնք կօգնեն բարելավել ինքնազգացողությունը:

Բուժման հիմնական սկզբունքներն են.

1. խուսափել ծանր իրեր և ծանր պայուսակներ կրելուց,

2. ազատվել ավելորդ քաշից,

3. ընդունել ցավազրկող հակաբորբոքային դեղամիջոցներ՝ բորբոքումից ու ցավից ազատվելու համար:

Թիակների ստորին հատվածի ցավ

Առհասարակ մեջքի ցավը կարող է պայմանավորված լինել բազմաթիվ վտանգավոր պատճառներով: Օրինակ՝ թիակների ստորին հատվածի ցավի պատճառ կարող է լինել սրտամկանի կաթվածը: Սա շատ լուրջ ախտանշան է, որը ոչ մի դեպքում չի կարելի անտեսել:

Սակայն բարեբախտաբար ոչ բոլոր դեպքերում է մեջքի ցավը վկայում սրտի հետ կապված խնդիրների մասին: Եթե մեջքի ցավը պայմանավորված է սրտամկանի կաթվածով, ապա կան այդ մասին հուշող որոշ ախտանշաններ.

1. Ցավն ի հայտ է գալիս թիակների միջև, սակայն ավելի շատ տարածվում է դրանցից որևէ մեկի հատվածում:

2. Երբեմն ցավը տարածվում է նաև ձախ ուսի հատվածում:

3. Հաճախ ցավը տարածվում է նաև ստորին ծնոտի հատվածում՝ ձախ կամ աջ կողմից:

Մեջքի ցավեր՝ պայմանավորված ողի կոտրվածքով

Հաճախ տարեցներին անհանգստացնում է մեջքի սուր ցավը, իսկ բուժզննումը ցույց է տալիս, որ պատճառը ողերից մեկի կոտրվածքն է՝ չնայած, որ դրան նպաստող հանգամանք չի եղել:

Բժիշկները բացատրում են, որ կյանքի երկրորդ կեսին կանանց մոտ կարող է առաջանալ օստեոպորոզ, որի դեպքում ոսկրային հյուսվածքները թուլանում են և դառնում ավելի փխրուն, ինչի հետևանքով կոտրվածքները կարող են առաջանալ նույնիսկ առանց որևէ լուրջ պատճառի:

Եթե կոտրվում է միայն ողը և դրա կտորները ճնշում չեն գործադրում նյարդային վերջավորությունների վրա, ապա խնդիրը լուծվում է անվնաս վիրահատության միջոցով: Այդ դեպքում կոտրված ողի հատվածում ասեղի օգնությամբ ներարկվում է հատուկ միացնող նյութ, որը վերականգնում է ողը և ազատում է ցավից:

Սովորաբար նման վիրահատությունից հետո հիվանդը տուն է վերադառնում մեկ օր անց:

Նյութի աղբյուրը՝ lady-21vek.ru