Ստուգել են նրա աշխատանքային սեղանը. կրթության տեսչավորման բաժնի պետը կասկածվում է փաստաթղթեր կեղծելու մեջ

ՀՀ Կրթության եւ գիտության նախարարության Կրթության պետական տեսչության մասնագիտական կրթության տեսչավորման բաժնի պետ Սամսոն Սահակյանը կասկածվում է կաշառք ստանալու պատրվակով խարդախության եւ փաստաթղթեր կեղծելու մեջ: Այս մասին այսօր՝ հունիսի 22-ին, NEWS.am-ը տեղեկացավ ՀՀ քննչական կոմիտեի մամուլի ծառայությունից:

Նշենք, որ հարուցվել է քրեական գործ, նրան ձերբակալելու որոշում է կայացվել, սակայն, Քննչական կոմիտեից չհաստատեցին նրան ձերբակալելու մասին լուրերը:

Մեզ հետ զրույցում Կրթության տեսչության պետ Արամ Կարապետյանը նշեց, որ հունիսի 17-ին իրավապահ մարմինները տեսչությունում ստուգում են իրականացրել՝ խուզարկել են Սամսոն Սահակյանի աշխատանքային սեղանը, որից հետո նրան բաժին են տարել, ավելի ուշ՝ ազատ արձակել:

«Շաբաթ օրը համապատասխան մարմինների հետ իր սեղանն են եկել նայելու, ես էլ ներկա եմ եղել տեսչությունում, նրա հետ էին, ոչ մի բան չհայտնաբերեցին, հետո նրա հետ բաժին գնացին, այնուհետեւ նրան բաց թողեցին: Թե հետո ինչ է եղել՝ չգիտեմ»,-ասաց նա:

Կրթության տեսչության պետը նշեց, որ տեղեկություններ չունի՝ արդյոք նա ձերբակալվել է, թե ոչ:

«Բացարձակ տեղեկություն չունեմ՝ ձերբակալված է, թե չէ: Նա հիմա արձակուրդի մեջ է՝ երկուշաբթի օրվանից ոչ  զանգի է պատասխանում, ոչ նամակների:  Բայց ես տեղյակ եմ, որ ինքը կասկածվում է  կեղծ փաստաթղթի ձեւակերպման, ստացման մեջ եւ իր արարքը կապ չունի ոչ տեսչական գործառույթների, ոչ էլ պաշտոնի անձնագրի հետ: Սա լոկալ ինչ-որ խնդիր է, մարդ է հիմա, թողնենք քննչական մարմիններին՝ տեսնենք ինչ կասեն: Ինքը մեր լավ աշխատողներից մեկն է եղել, մի քանի տասնյակ դեպքեր հենց ինքն է հայտնաբերել՝ կապված  կեղծ դիպլոմների, ատեստատների հետ:  Զայրացած ենք մենք, թե ինչպես կարող էր նման բանի մեջ կասկածվել»,-ասաց նա: