ԱՄՆ–ն հզոր հարված է պատրաստում Սիրիայի համար
Միջազգային
ԱՄՆ պետդեպարտամենտն այդպես էլ մինչև վերջ հրաժարվեց որևէ հոդաբաշխ բացատրություն տալ այն մասին, թե ինչ աղբյուրներից և ինչպես է իրենց հայտնի դարձել Սիրիայի նախագահ Բաշար ալ–Ասադի կողմից հնարավոր նոր քիմիական հարձակման նախապատրաստության մասին տեղեկատվությունը: Սակայն, այստեղ ոչ միայն արդեն Ֆրանսիայի նախագահ Էմանուել Մակրոնի տեսքով են Սիրիային պատժող դաշնակից գտել, այլև CNN–ի վկայությամբ, իրենց ռազմանավերն ու ինքնաթիռները տեղավորել են հարձակողական դիրքերում, Սիրիայի՝ ողբերգականորեն հայտնի Շայրաթ ավիաբազային հարվածելու համար: Հեռուստաընկերության տեղեկատուների տվյալներով՝ ամերիկյան օդուժը շուրջօրյա հսկողություն է սահմանել Շայրաթի ուղղությամբ, որովհետև հետախուզությունն, իբր, այնտեղ ինքնաթիռների և անհասկանալի բեռնարկղերի տեղաշարժ է նկատել վերջին օրերին: Մյուս կողմից էլ՝ USS George H.W. ավիակիրը, Tomahawk թևավոր հրթիռներով հագեցած 2–ական ականակիրների ու հածանավերի հետ մեկտեղ, պարեկություն են անում Միջերկրականի արևելյան ջրերում: Հաղորդվում է նաև, թե Սիրիային հարվածելու համար գործի են դրվելու նաև տասնյակ ռազմական ինքնաթիռներ, որոնք ԱՄՆ հրամանատարությունը հենց այս շրջանում է կուտակել:
ՌԴ արտգործանախարար Սերգեյ Լավրովն, ի դեպ, տեղեկության տարածումից անմիջապես հետո հայտարարեց, որ հույս ունի ԱՄՆ–ն այս անգամ իսկապես կառաջնորդվի քիմիական զենքի չտարածման ռեժիմի պաշտպանությամբ, ոչ թե ինչ–ինչ հետախուզական գաղտնի տվյալներով սպեկուլյացիաներ կանի՝ այդկերպ պատճառ մոգոնելով ահաբեկչության դեմ պայքարող կառավարական բանակին հերթական անգամ հարվածելու համար: Լավրովն, այսպիսով, ԱՄՆ–ին կոչ է արել սադրանքի չգնալ՝ հակառակ դեպքում համարժեք պատասխան խոստանալով: «Մենք կարձագանքենք արժանապատվորեն՝ համարժեք այն իրավիճակին, որը կձևավորվի»,– ասել է ՌԴ ԱԳնախարարը:
Դրան զուգահեռ՝ ՄԱԿ–ում ՌԴ մշտական ներկայացուցիչ Վլադիմիր Սաֆրոնկովն է բանավեճ ծավալել, երբ կառույցում ԱՄՆ ներկայացուցիչ Հեյլին է հանդես եկել նույն մտահոգությամբ՝ հերթական անգամ հակասական հայտարարություն անելով այն մասին, թե Ասադի հետ Սիրիան չի կարող կենսունակ լինել: «Եթե դուք խոսում եք քիմիական գրոհի, ոչ թե Ասադի մասին, որին, ի դեպ, ձեր իսկ հայտարարությամբ, այլևս չեք կամենում իշխանազրկել, պիտի հիշեք, որ մի անգամ չենք լսել ԴԱԻՇ–ի և այլ խմբավորումների կողմից ահաբեկչության նպատակով գործածվող արդյունաբերական քիմիկատների և ռազմական թունավոր նյութերի մասին: Այդ փաստերը հաստատվել են պաշտոնապես, այդ թվում՝ օտարերկրյա հետախուզական մարմինների կողմից… Հետևաբար, անհրաժեշտ է խուսափել գիտակցաբար արվող դեզինֆորմացիայից՝ հիմնվելով հստակ և ապացուցվող փաստերի վրա…Կարծում եմ Անվտանգության խորհուրդը պիտի կոշտ արձագանքի իր բանաձևերի ցանկացած խախտման առիթով»,– հայտարարել է Սաֆրոնկովը:
Ինչպես կզարգանան իրադարձությունները, դեռ վաղ է ասել: Բայց դժվար է, իհարկե, չնկատել ոմանց փարիսեցիությունը՝ անմեղ քաղաքացիների հնարավոր մահվան հետ կապված այն դեպքում, երբ հենց նույն պահին, Դեյ–Էզ–Զորի Ալ–Դաբլյան ավանում, ռազմական ինքնաթիռներից տեղացած հարվածների արդյունքում, մոտ 40 իրական կանայք ու երեխաներ են սպանվում, իսկ Ալ–Բադիայում հազարավոր մարդիկ են լքում իրենց տներն ու անասուններին՝ փախչելով իրենց Ասադից ազատագրողներից: Դժվար է հասկանալ նաև Լավրովին, որը խոսելով ԱՄՆ–ի՝ դեռ չկայացած հարվածների անընդունելիության մասին, աչքաթող է անում Գոլանի բարձունքներին՝ Իսրայելի կողմից այս գիշեր հասցված հերթական հարվածները: Եվ դա այն դեպքում, երբ Հոմսի Ալ–Վաար թաղամասի բնակիչները, որոնք երկար ընդմիջումից հետո են վերադառնում, ամենուրեք իսրայելական զենք ու զինամթերք են գտնում տներում…
Հ.Գ. Նյութն արդեն պատրաստ էր, երբ Պենտագոնի ղեկավար Ջեյմս Մետիսը հանդես եկավ հայտարարությամբ, իբր՝ Սիրիայի իշխանությունները լրջորեն ընդունելով ԱՄՆ նախազգուշացումները, ակնհայտորեն վախեցան քիմիական զենք գործածել: Վախենամ՝ ճիշտ հակառակ պրոցեսն է եղել, և փայփայվող ահաբեկիչներն են հետ կանգնել իրենց նպատակներից: Բայց նույնիսկ այդ դեպքում արդեն իսկ լավ է, որ սադրանքի հեղինակները, կարծես թե, հրաժարվել են նոր լարումից…
1
2
3
4
5
1
4
5
1
3
4
5
