Դատավորը կրկին սանկցիա կիրառեց Ժիրայր Սեֆիլյանի պաշտպանի նկատմամբ
Ուշադրության կենտրոնում
Երեւանի Շենգավիթ վարչական շրջանի ընդհանուր իրավասության դատարանում այսօր՝ հուլիսի 4-ին, դատավոր Տաթեւիկ Գրիգորյանը սանկցիա կիրառեց Ժիրայր Սեֆիլյանի պաշտպան Տիգրան Հայրապետյանին:
Դատարանը պաշտպանին պատասխանատվության ենթարկելու պահանջով կդիմի Փաստաբանների պալատին: Նշենք, որ Տիգրան Հայրապետյանի նկատմամբ դատարանը նախորդ նիստին էլ էր սանկցիա կիրառել, քանի որ Սեֆիլյանին հեռացնելուց հետո նիստերի դահլիճից նաեւ պաշտպանն էր հեռացել: Հիշեցնենք, որ նախորդ նիստին դատարանը 10 ժամով դատական նիստերի դահլիճից հեռացրել էր Գեւորգ Սաֆարյանին, Ժիրայր Սեֆիլյանին, Ներսես Պողոսյանին, Հրայր Թոփչյանին: Նիստերի դահլիճից հեռացված է նաեւ Գալուստ Գրիգորյանը:
Նիստին ներկա են միայն ամբաստանյալներ Սասունիկ Կիրակոսյանը եւ Հովհաննես Պետրոսյանը:
Նշենք, որ այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում:
Ժիրայր Սեֆիլյանին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երեւան քաղաքում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար:
Նշենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
1
2
3
4
5
2
3
4
1
2
3
4
5
