«Սասնա Ծռերը» դատարանի խցից մեկ առ մեկ բերվում էին նիստերի դահլիճ. նիստը հետաձգվեց

Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր` հուլիսի 6-ին, «Սասնա Ծռեր» խմբի 18 անդամների գործով դատական նիստին ամբաստանյալները դատարանի խցից մեկ առ մեկ բերվում են նիստերի դահլիճ, ճշտվում է նրանց ինքնությունը, պաշտպաններ են ներգրավվում եւ կրկին հեռացվում են:

Ամբաստանյալներից Տիգրան Սարգսյանի շահերի պաշտպան ներգրավվեց Գրիշա Բալասանյանը, Վարդգես Գեւորգյանի պաշտպան` Կարեն Մեժլումյանը, Հովհաննես Վարդանյանի պաշտպան` Անուշ Մխիթարյանը, Մանվել Աթոյանի պաշտպան` Արա Ղարագյոզյանը, Հովհաննես Հարությունյանի` Հայարփի Սարգսյանը: Հովհաննես Հարությունյանը հայտարարեց, որ չի ցանկանում, որ իր պաշտպանը մասնակցի դատական նիստին` առանց իր ներկայության: Դատարանը որոշեց նիստը հետաձգել:

Հաջորդ դատական նիստը տեղի կունենա հունիսի 14-ին:

Հիշեցնենք, որ այսօրվա նիստին 18 ամբաստանյալներից մասնակցում էին միայն 3-ը` դատավոր Արտուշ Գաբրիելյանը նախորդ նիստին վեց ժամով հեռացրել էր «Սասնա Ծռեր» խմբի 18 անդամներից 15-ին. նրանց նկատմամբ դատական սանկցիա էր կիրառվել ոտքի չկանգնելու համար: Դատարանը սանկցիա չէր կիրառել միայն Հովհաննես Հարությունյանի, Թաթուլ Թամրազյանի եւ Արամ Մանուկյանի նկատմամբ` նշելով, որ նրանք առողջական խնդիրներ ունեն եւ կանգնել չեն կարող: Սակայն, ավելի ուշ Հովհաննես Հարությունյանը, Թաթուլ Թամրազյանն ու Արամ Մանուկյանը եւս լքեցին նիստերի դահլիճը` նշելով, որ չեն ցանկանում մասնակցել նիստին առանց իրենց ընկերների:

Նշենք, որ Հովհաննես Հարությունյանն այսօր դատարան է ներկայացել Մոնթե Մելքոնյանի նկարով վերնաշապիկով` «Իմ կենացը մի´ խմեք, այլ իմ գործը շարունակե´ք» գրությամբ:

Նշենք, որ այս նիստն անցկացվում է արտագնա. Էրեբունի եւ Նուբարաշեն վարչական շրջանների ընդհանուր իրավասության դատարանի վարույթում քննվող գործով նիստերն անցկացվելու են Երեւանի Ավան եւ Նոր Նորք վարչական շրջանների ընդհանուր իրավասության դատարանում, որտեղ հատուկ «Սասնա Ծռերի» գործը քննելու համար դահլիճն ապակեպատ են դարձրել:

Հիշեցնենք, որ «Սասնա Ծռերի» 14 անդամի գործով նիստերը նույնպես անցկացվում են Ավան եւ Նոր Նորք վարչական շրջանների ընդհանուր իրավասության դատարանում: