Գալուստ Սահակյանի որդին զեկուցել է Սերժ Սարգսյանին (Ֆոտո)

Հանրապետության Նախագահի հետ աշխատանքային հանդիպման ընթացքում ՀՀ կառավարությանն առընթեր պետական գույքի կառավարման վարչության պետ Արման Սահակյանն այսօր զեկուցել է ոլորտում իրականացվող բարեփոխումների, ակնկալվող արդյունքների, ընթացիկ ծրագրերի եւ առկա խնդիրների լուծման հնարավորությունների մասին։

Արման Սահակյանը Նախագահին տեղեկացրել է Պետական գույքի մասնավորեցման 2017-2020 թվականների ծրագրում ընդգրկված ընկերություններ նոր ներդրումների ներգրավման, ընկերությունների վերազինման եւ դրա շնորհիվ արդյունավետության բարձրացման հնարավորությունների, ինչպես նաեւ պետական գույքի կառավարման ոլորտում առկա այլ խնդիրների մասին: Հանրապետության Նախագահը կարեւորել է մասնավորեցվող մասնագիտացած ընկերությունների պրոֆիլային ուղղվածության, աշխատակազմերի նկատմամբ սոցիալական պարտավորությունների պահպանման խնդիրները, ինչպես նաեւ պետական գույքի վաճառքի գործընթացում նոր, առավել արդյունավետ մեթոդների եւ գործիքների կիրառումը:

Այս համատեքստում ՊԳԿ վարչության պետ Սահակյանը զեկուցել է նաեւ պետական բաժնեմասով ընկերությունների գործունեության արդյունավետության բարձրացմանն ուղղված քայլերի, տարեկան կտրվածքով իրականացվող ֆինանսատնտեսական մոնիթորինգի ընդհանուր արդյունքների մասին: Հանրապետության Նախագահը կարեւորել է այդ ընկերությունների կողմից գործարար ծրագրերի մշակման հստակ որակական չափորոշիչների ներդնումը ու դրանց իրականացման արդյունավետության գնահատումը՝ պետական կառավարման համապատասխան մարմինների հետ համատեղ աշխատանքի արդյունքում:

Այս կապակցությամբ նաեւ հանձնարարվել է կառավարությանը ֆինանսատնտեսական մոնիթորինգի արդյունքների համալիր վերլուծություն իրականացնել՝ ուսումնասիրելով առանձին առեւտրային կազմակերպությունների ֆինանսատնտեսական վիճակի ցուցանիշներն ու դրանց գործունեության բարելավման ուղղությամբ ձեռնարկվող միջոցների համարժեքությունը: Հանձնարարվել է նաեւ արագացնել այդ կազմակերպությունների ծրագրային ցուցանիշների կատարման ընթացքի նկատմամբ հսկողության իրականացման եւ գործունեության թափանցիկության ապահովման, ինչպես նաեւ դրանց գործադիր մարմինների գործունեության գնահատման հստակ մեխանիզմների մշակումն ու ներդնումը:

Կառույցի ղեկավարն անդրադարձել է սոցիալական կարեւոր նշանակություն ունեցող՝ հանրակացարանային տարածքների սեփականաշնորհման եւ նվիրատվության գործընթացներն ավարտին հասցնելու հարցին: Նախագահը հանձնարարել է այն պահել մշտական հսկողության տակ, պատշաճ ուշադրություն հատկացնել վարչարարության պարզեցմանը, ընթացակարգերի դյուրացմանը, բնակչության կողմից բարձրացվող մյուս հարցերին:

Արման Սահակյանը ներկայացրել է նաեւ պետական անշարժ գույքի օգտագործման ոլորտում մասնավորեցումից, օտարումից, վարձակալությունից գոյացող եւ պետական բյուջե վճարվող ֆինանսական մուտքերի դինամիկան ըստ տարիների, ինչպես նաեւ պետական սեփականություն համարվող անշարժ գույքի հաշվառման եւ գրանցամատյանի վարման ոլորտում իրականացվող աշխատանքները։ Հանրապետության Նախագահը հանձնարարել է ոլորտում էապես մեծացնել արդիական տեխնոլոգիաների կիրառումը, կատարելագործել հաշվառման էլեկտրոնային շտեմարանները:

Վարչության պետը Հանրապետության Նախագահին զեկուցել է նաեւ պայմանագրային պարտավորությունների վերահսկողության եւ ըստ այդմ՝ ընթացիկ արդյունքների մասին: Հանձնարարվել է արդարադատության նախարարության հետ համատեղ ուսումնասիրել սնանկության վարույթի շրջանակներում պետական սեփականություն հանդիսացող գույքի իրացման հետ կապված խնդիրները՝ պարտավորությունների բավարարման արդյունավետությունը բարձրացնելուն ուղղված համապատասխան իրավական կարգավորումներ մշակելով:

Հանրապետության Նախագահը հանձնարարել է ակտիվացնել աշխատանքները նախատեսված ծրագրերը սահմանված ժամկետում ավարտելու համար՝ ընդգծելով, որ դրանք կարեւոր նշանակություն ունեն ինչպես պետական գույքի կառավարման արդյունավետության բարձրացման, այնպես էլ ներդրումների խթանման միջոցով տնտեսության աշխուժացմանը նպաստելու առումով: