Մերի Քոչարյան. «Ամենածիծաղելի դրվագները լինում են իմ և քրոջս վեճի ընթացքում»

Մերի Քոչարյանին հեռուստադիտողը ճանաչեց «Մանկական նոր ալիք-2015» երգի մրցույթից, որի ընթացքում երգչուհին զբաղեցրեց երրորդ հորիզոնականը: Մերիին շատ շուտով հեռուստադիտողը կտեսնի նոր՝ «Նվագախմբի երեխաները» նախագծում, որը հեռարձակվելու է Յուքոմ ցանցում գործող Արմենիա Պրեմիումի եթերում: Մյուզիքլում գործողությունները զարգանում են երևակայական երաժշտական դպրոցում, որտեղ իրենց ուսումնառության ընթացքում հերոսները հաջողացնում են հայտնվել տարատեսակ զվարճալի ու խնդրահարույց իրավիճակներում, որոնցից դուրս գալու համար ստիպված են ցուցաբերել միասնականություն, հնարամտություն ու կամքի ուժ: Մյուզիքլի երգերը գրել են Ավետ Բարսեղյանը, Մանե Հակոբյանը և Գրիգոր Կյոկչյանը: BlogNews.am-ը ներկա է եղել նկարահանումներին և զրուցել է Մերիի հետ, ով նախագծում մարմնավորում է Նանեին:

«Նախագծի մասին իմացել եմ Գրիգոր Կյոկչյանից, ով մեր նախագծի երաժշտական պրոդյուսերն է: Երբ եկա քասթինգի, հարյուրավոր երեխաներ էին եկել, և չգիտեի՝ կհայտնվեի այն հաջողակների շարքում, ովքեր հնարավորություն կունենային նկարահանվել այս մյուզիքլում: Իմ կարծիքով՝ նախագծի գաղափարը ընկերասիրությունն է (այն նաև ուսուցողական է երեխաների համար), ընկերների հնարամտությունը, որի շնորհիվ նրանք կարողանում են ամեն դժվարությունից դուրս գալ: Ես հաճախ եմ արկածային իրավիճակներում հայտնվում, հիմնականում ես լինում եմ կոնֆլիկտներ հարթողը»

Մերին նախագծում բավականին խելացի և հավասարակշռված աղջկա է մարմնավորում, ասում է, որ իրական կյանքում էլ է այդպիսին. «Մյուզիքլում քույրս իմ հակապատկերն է, մենք գրեթե միշտ վիճում ենք իրար հետ: Նա ավելի գլամուր կերպարում է, բայց ամենածիծաղելի դրվագները լինում են իմ և քրոջս վեճի ընթացքում»:

Նախագծում Մերին, այսպես ասած, համատեղում է երգչուհու և դերասանուհու մասնագիտությունները, բայց թե հետագայում որը կընտրի, դեռ չի կողմնորոշվել. «Եթե մինչ այս մտածում էի, որ կդառնամ երգչուհի, նախագծի նկարահանումներից հասկացա, որ դերասանուհու աշխատանքն էլ է ինձ դուր գալիս: Դեռ չեմ կողմնորոշվել, կարծում եմ՝ մի քիչ էլ մեծանամ, ընտրությունս արդեն պարզ կլինի»:

Նյութը՝ Սիրանուշ Գրիգորյանի

Լուսանկարները՝ Կարեն Հովհաննիսյանի