Մերի Մարգարյանի գործով ամբաստանյալ բժշկուհին դատարանում ցուցմունք տալիս վատացավ. նիստը հետաձգվեց (ֆոտո)

Ծննդկան Մերի Մարգարյանի եւ նորածնի մահվան գործով այսօր՝ հուլիսի 11-ին, դատարանում ցուցմունք տվեց ամբաստանյալ Անի Բաբելյանը:

Երեւանի Շենգավիթ վարչական շրջանի ընդհանուր իրավասության դատարանում մինչեւ դեպքի վերաբերյալ մանրամասները հայտնելը Անի Բաբելյանը ցավակցեց Մերի Մարգարյանի ընտանիքին:

«Հուլիսի 25-ին երեկոյան 20:00-ի սահմաններում ինձ դիմեց ընդունարանի հերթապահ մանկաբարձուհին եւ հայտնեց, որ Մերի Մարգարյանը դիմել է մեզ, ինքը չափել է ջերմությունն ու վերցրել անալիզներ: Ես իջա ներքեւ, Մերիին հարցրի, թե ինչ գանգատներ ունի, նա պատասխանեց, որ այդ պահին գանգատ չունի, մինչ այդ ջերմություն է ունեցել, հղիությունը վարող Շուշանիկ Բախշյանն էլ ասել է, որ դիմի հիվանդանոց: Մերին ինձ ասաց, որ վիտամիններ է խմել եւ հեղուկներ: Ես ասացի, որ հետազոտության արդյունքները ստանալուց հետո կհասկանանք ինչ անել: Դրանից հետո ես արագ բարձրացել են վիրահատության»,- պատմեց Անի Բաբելյանը:

Ամբաստանյալը նշեց, որ չնայած ինքը վիրահատության է եղել, հետազոտությունների արդյունքները հեռախոսով բառացիորեն կարդացել է Շուշանիկ Բախշյանի համար: Բաբելյանի խոսքով, անմիջապես վիրահատությունից հետո ինքն իջել է ներքեւ, սակայն այնտեղ ոչ Մերի Մարգարյանին, ոչ հարազատներին չի տեսել:

«Այնուհետեւ ես բարձրացա վերեւ զբաղվելու վիրահատված հիվանդով: Այդ ընթացքում նաեւ Շուշանիկ Բախշյանին ասացի, որ Մերի Մարգարյանն առանց զգուշացնելու հեռացել է: Այդ մասին տեղեկացրել եմ նաեւ բուժգծով տեղակալ Դավիթ Մխիթարյանին, նա էլ ասաց, որ մատյանում անպայման գրառում անեմ եւ փակցնեմ անալիզների պատասխանները»,- ասաց Անի Բաբելյանը:

Վերջում ամբաստանյալը նշեց, որ իրեն առաջադրված մեղադրանքը չի ընդունում եւ չէր կարող վիրահատարանում գտնվելու ընթացքում որոշում կայացնել. «Վիրահատությունից անմիջապես հետո իջել եմ ընդունարան եւ հղին այնտեղ չէր: Ինձ համար տարօրինակ է, որ այսօր այստեղ եմ»:

Անի Բաբելյանը հայտարարեց, որ ինքը որեւէ հարցի չի պատասխանելու: Այնուամենայնիվ, մեղադրող Արա Մնացականյանը հետաքրքրվեց՝ Մերի Մարգարյանը կամ հարազատները ծանոթացել են հետազոտությունների արդյունքներին: Անի Բաբելյանը նշեց, որ ինքը ցուցում չի տվել, որ հայտնեն անալիզների պատասխանը: Մեղադրողը ստիպված էր հարցը նորից կրկնել, Անի Բաբելյանն այս անգամ հրաժարվեց պատասխանել հարցին: Մեղադրողի մյուս հարցին՝ ո՞րն է տրամաբանությունը, որ առանց գանգատի դիմում են հիվանդանոց, հետո առանց հետազոտությունների պատասխաններին ստանալու հեռանում, Անի Բաբելյանը կրկին անպատասխան թողեց: Դատախազը հետաքրքրվեց՝ ինչպես է կարգը հիվանդանոցում այն դեպքում, երբ մի հերթապահ բժշկուհին վիրահատության է, ով պետք է զննի հիվանդանոց դիմած մեկ այլ հիվանդի, Բաբելյանը նշեց միայն, որ կար այլ հերթապահ բժիշկ: Թե ինչու այդ հերթապահ բժշկին չեն դիմել, ամբաստանյալը չկարողացավ պատասխանել. «Թող դիմեին…»:

Տուժողի իրավահաջորդի ներկայացուցիչ Մարինե Թովմասյանի հարցին՝ ինչպես է ստացվել, որ այդ օրվա հետազոտությունների արդյունքների բնօրինակը Մերի Մարգարյանի հարազատներն են ներկայացրել վարույթն իրականացնող մարմնին, ամբաստանյալը կրկին անպատասխան թողեց:

Նշենք, որ ըստ մեղադրանքի՝ Անի Բաբելյանը մեղադրվում է հուլիսի 25-ին Մերի Մարգարյանին չհոսպիտալացնելու համար: Մարինե Թովմասյանը նկատեց՝ եթե վիրահատության է եղել եւ չի զննել Մերի Մարգարյանին, ինչու է նման պատասխանատվություն վերցրել եւ Մերի Մարգարյանի վիճակի մասին մատյանում գրառում կատարել: Անի Բաբելյանը համաձայնվեց:

Տուժողի իրավահաջորդ, Մերի Մարգարյանի հոր՝ Վաղինակ Մարգարյանի, հարցին՝ հաստատ վիրահատության եղել է, Անի Բաբելյանը դրական պատասխան տվեց: Վաղինակ Մարգարյանը նշեց, որ իրենք հիվանդանոց են եկել ժամը 18:10-ին եւ դուրս են եկել հիվանդանոցից ժամը 18:50-ին, երբ հերթապահ Նինա Զոհրաբյանն Բաբելյանի ցուցումով ասել է, թե գնացեք, ձեզ հետ կապ կհաստատի Շուշանիկ Բախշյանը, ինչն էլ իրենք արել են: Հետաքրքիր է, որ Անի Բաբելյանը դատարանում պնդեց, որ ժամը 20:00-ի սահմաններում է տեսել Մերի Մարգարյանին: Մահացած ծննդկանի հոր դիտարկմանը, թե Մերի Մարգարյանն իրենց ասել է, որ ոչ ոք չի իջել, քանի որ Նինա Զոհրաբյանը հայտնել է, որ բժշկուհին վիրահատության է:

«Ես Նինա Զոհրաբյանին ասել եմ, որ գնա, մի րոպեով հենց կանչի հերթապահ բժշկին, Զոհրաբյանը պատասխանեց, որ փոխանցել է հերթապահ բժշկին, այնուհետեւ ինձ տվել են անալիզների պատասխանը»,- ասաց Վաղինակ Մարգարյանը:

Տուժողի իրավահաջորդի մյուս հարցին՝ պնդում եք, որ Մերի Մարգարյանին տեսել եք, Անի Բաբելյանը չպատասխանեց:

Ամբաստանյալի վիճակը վատացավ: Նիստը հետաձգվեց: