Ինձ, միանշանակ, ակումբներում աշխատելիս չեն տեսնի. Լենա Ղազարյան

Life.panorama.am-ը գրում է.

«Շանթ» հեռուստաընկերության» «Իմ անունն է», «X ֆակտոր» եւ «Պրեմիերա» նախագծերից հայտնի դարձած երգչուհի Լենա Ղազարյանը Life.panorama.am-ի այսօվա զրուցակիցն է: Մեզ հետ զրույցում նա հայտնեց, որ նախագծերից հետո լռությունը պայմանավորված կլինի նոր եւ առավել տպավորիչ վերադարձով. «Այս շրջանում դեռ լուռ եմ, բայց վերադարձս կարող է ավելի տպավորիչ լինել: Ամեն բան անում եմ, որպեսզի այս տարի ներկայացնեմ իմ տեսահոլովակը, որը կլինի Նիկ Էգիբյանի եւ Գայանե Ավետիսյանի հեղինակած «Ամառը ցուրտ է» կոչվող երգի հիման վրա»,- նշեց երիտասարդ երգչուհին:

Բոլորովին վերջերս ավարտելով Ռոմանոս Մելիքյանի անվան երաժշտական քոլեջը՝ Լենան նպատակ ունի շարունակել երաժշտական կրթությունը. «Ցանկություն ունեմ ընդունվել Երեւանի Կոմիտասի անվան պետական կոնսերվատորիա եւ երաժշտական կրթությունս ավելի ամրապնդել: Առհասարակ, ճիշտ եմ գտնում այս ասպարեզ հաստատվելուց առաջ երաժշտական կայուն եւ խորը գիտելիքներ ձեռք բերեմ, որպեսզի արածս գործը առավել կիրթ լինի»,- նկատեց նա:

Միաժամանակ, երիտասարդ երգչուհին արդեն հասցրել է անձամբ զբաղվել դասավանդությամբ՝ այսօր նա արդեն աշակերտներ ունի եւ վոկալ է դասավանդում: Ի դեպ, նրա խոսքերով, որպես հոբբի բոլորովին վերջերս դիմահարդարման արվեստին է ծանոթացել. «Շատ եմ սիրում դիմահարդարումը, վերջերս էլ որոշեցի պրոֆեսիոնալ գիտելիքներ ձեռք բերել այդ ոլորտում եւ հիմա արդեն տանը զբաղվում եմ նաեւ այդ աշխատանքով: Ապագայում մտադրություն ունեմ Էջմիածնում բացել իմ սեփական սրահը, Աստված առաջ, տեսնենք, թե ինչպես կդասավորվի»,- նշեց երգչուհի-դիմահարդարը:

Այս պահին երգչուհին զբաղված է նաեւ cover երգերի հավաքագրումով. «Նոր ձայանսկավառակ կլթողարկեմ առաջիկայում, որտեղ կներկայացնեմ հայտնի երգերի cover տարբերակները: Դրանցում տեղ կգտնեն նաեւ մեր հին հայկական երգերը, ինչու չէ նաեւ այն երգերը, որոնք մարդիկ ռաբիզ են համարում, բայց ես դրանք կներկայացնեմ այլ կերպ: Պետք է նշեմ, որ այդ բոլոր աշխատանքների հարցում ինձ օգնում է Արմեն Մնացականյանը»,- պատմեց նա ու հավելեց, որ արդեն առաջիկայում հնարավոր է հանդիսատեսը նոր Լենայի տեսնի. «Մտադրություն ունեմ նաեւ որոշակի ոճային փոփոխություն կատարել, մինչ այս հնչած կատարումներիս կողքին այլ ոճի նոր կատարումներ էլ կլինեն»:

Ամբողջական հոդվածը կարող եք կարդալ այստեղ