«Հայաստանում ինձ սկսեցին ճանաչել քրոջս՝ Իվետա Մուկուչյանի շնորհիվ». Մարիաննա Մուկուչյան

Մարիաննա Մուկուչյանին շատերը ճանաչեցին քրոջ՝ Իվետա Մուկուչյանի շնորհիվ, բայց քչերը գիտեն, որ նա Բոլիվուդում հայտնի ոճաբան է: Օրեր առաջ BlogNews.am-ը հանդիպել է Մարիաննայի հետ, լուսանկարել նրան և զրուցել: 

Ես չորս տարի Երևանում չէի եղել, շատ կարոտել էի: Իմ նախագծերն այնքան շատ են, որ չեմ հասցնում գալ Երևան: Այս անգամ ինձ Իվետան կանչեց, ով հիմա այստեղ նոր նախագծերով է զբաղվում, դրա մասին հիմա չենք բարձրաձայնում: Նա շատ էր ուզում, որ այս ընթացքում նրա կողքին լինեի: Ես պլանավորել էի տասը օրով գալ, բայց որոշեցի մի քիչ երկար մնալ, կարոտս առնել: Վաղն արդեն մեկնում եմ:

Ես շատ սիրում եմ Երևանով քայլել: Մեր տունը Հանրապետության հրապարակին մոտ էր, այստեղ ենք մեծացել: Ես գտնում եմ, որ Երևանն այնքան սիրուն քաղաք է, մանավանդ այս չորս տարվա ընթացքում, որ այստեղ չեմ եղել, ավելի է գեղեցկացել: Կարոտս եմ առնում հայկական ուտելիքներից, ամեն օր այնքան շատ եմ ուտում, Իվետային միշտ ասում եմ՝ ինձ տար այնպիսի տեղեր, որտեղ հայկական ուտեստներ կարող եմ ուտել:

Իմ մանկության երազանքը պարուհի դառնալն էր: Երազում էի մեծ բեմերի մասին, փոքր տարիքից զբաղվել եմ պարով։ Երբ տեղափոխվեցինք Գերմանիա, շարունակվեցինք զբաղվել պարով: Երբ արդեն քսան տարեկան էի, ներգրաված էի տարբեր պարային խմբերում, մեծ բեմերում էինք ելույթ ունենում: Այդ ժամանակ սկսեցի ես զբաղվել աղջիկների դիմահարդարմամբ, որն այնքան սկսեց դուրս գալ,որ սկսեցի զբաղվել դրանով: Որոշեցի որ այդ մասնագիտությամբ եմ ուզում գնալ, բայց ինձ ավելի դուր էր գալիս ֆեյշն ուղղությունը:

Ես շատ ուրախ եմ, որ Հնդկաստանում իմ աշխատանքը գնահատվում է: Ես արդեն չորս տարի է՝ այնտեղ եմ և չէի էլ սպասում, որ այսքան շուտ այս աստիճանին կհասնեմ: Հիմա ես ամենից շատ աշխատում եմ այնտեղի  հայտնիների հետ, դա էլ է ինձ համար մեծ ձեռքբերում է, քանի որ նրանք ամեն մեկի հետ չեն աշխատում: Իրենց համար, իհարկե, սկզբից բարդ էր, քանի որ ես մտածում էի, որ գուցե նրանք իմ ոճը չհասկանան, բայց պատկերացրեք, նրանք ժամանակի ընթացքում սկսեցին սիրել այն:

Ես շատ եմ աշխատում Այշվարիա Ռայի հետ: Ես միայն մի արտիստի հետ չեմ աշխատում, ես ինձ չէի ուզում կապել մի արտիստի հետ: Ինձ համար շատ կարևոր է, որ ազատ աշխատեմ, տարբեր արտիստների հետ: Ամեն անգամ երբ ուզում եմ Հնդկաստանից դուրս այլ նախագծերով զբաղվել, միշտ ասում են՝ կրկին գնո՞ւմ ես: Դրա համար եթե մեկի հետ կապվեմ, ինձ համար դժվար կլինի ազատ գրաֆիկով ապրել:

Ես մի մեծ ֆիլմում եմ աշխատել: Նկարահանվում էի Անգլիայում, Ֆրանսիայում և Շվեյցարիայում. դա ինձ համար հետաքրքիր էր: Դա իմ առաջին փորձն էր, հիմա էլ ունեմ նման առաջարկներ, բայց դեռ չեմ համաձայնվել, քանի որ դրա ծանրաբեռնվածությունը և գրաֆիկն այլ են: Ես մի անգամ կարող եմ աշխատել ամսագրի շապիկի համար, մի անգամ հաղորդման, այսինքն՝ ազատ եմ, և դա ինձ համար ավելի հետաքրքիր է:

Հայաստանում ես հայտնի դարձա Իվետայի շնորհիվ: Իվետան այստեղ շատ սիրված է, և ես հպարտ եմ դրանով: Ես շատ ուրախ եմ, որ մեզ գիտեն։ Մենք էլ ամեն տեղ Հայաստանի մասին ենք խոսում, անգամ Հնդկաստանում, երբ աշխատում եմ, միշտ խոսում եմ Հայաստանի մասին:  

Հայկական շոու բիզնեսին այդքան ծանոթ չեմ: Իհարկե, ես միշտ ուզում եմ Իվետայի նախագծերում լինել, բայց մենք հեռու ենք իրարից: Ապագայում ես կփորձեմ Երևան ավելի հաճախ գալ, ես անգամ կուզեի այստեղ սեմինարներ անցկացնել, ինչը, կարծում եմ, հետաքրքիր կլինի այստեղի դիմահարդարների հետ, ովքեր կարող են այստեղ այլ ոճի ծանոթանալ: Մարդիկ սկսել են ավելի շատ հետաքրքրվել դիմահարդարմամբ և վարսահարդարմամբ, իհարկե, դա ողջունելի է: Այստեղի ոճը շատ է տարբերվում եվրոպականից: Պետք է ասեմ, որ Հնդկաստանում էլ է ոճի փոփոխություն եղել, հիմա ավելի շատ սիրում են բնականին մոտ լինել:

Ես նկատել եմ, որ Հայաստանում կա մի ստանդարտ ոճ, որում ուզում են լինել գրեթե բոլորը:Ցավոք, այդպես շատերը փոխվում են, փոխվում է իրենց կերպարը: Ես գտնում եմ, որ յուրաքանչյուրի մեջ գեղեցիկը կա, բայց լավ կլինի, որ կարողանան իրենց ինդիվիդուալ գեղեցկությունը գտնել: Պետք է իրենց գեղեցկությունը ընդգծեն, այլ ոչ թե փոխեն և ստանան իրենց ստանդարտը: Հասկանում եմ, որ հիմա մեծ, արհեստական շրթունքները նորաձև են, բայց քո կերպարը պետք չէ լրիվ փոխել: Անգամ դիմահարդարման միջոցով պետք չէ նոր երես նկարել:

Ես և Իվետան իրար շատ նման ենք: Ասում են՝ արտաքինով էլ նմանություն ունենք: Մենք շատ ենք սիրում իրար հետ ճանապարհորդել, սիրում ենք նոր, գեղեցիկ վայրեր բացահայտել, սիրում ենք ֆիլմեր նայել: Ես տարիքով ավելի մեծ եմ Իվետայից: Իվետան հաճախ է ինձ լսում ոճի առումով, ավելի շատ՝ դիմահարդարման, հարցնում է: Նա իր ոճն ունի, իսկ ես՝ իմ: Հաճախ կարող ենք իրար հագուստ հագնել:

Ես ժամանակին շատ էի հետաքրքրվում դերասանությամբ: Գուցե այդ ուղղությամբ գնամ, բայց դեռ չգիտեմ: Ես և Իվետան աշխատում ենք հիմա մեր՝ Մուկուչյան բրենդի վրա, արդեն մի քանի նմուշ արել ենք, լինելու են աքսեսուարներ և հագուստ, բայց ամեն ինչ շատ քիչ քանակությամբ: Ամեն ինչը ձեռքի աշխատանք է լինելու:

Նյութը՝ Սիրանուշ Գրիգորյանի

Լուսանկարները՝ Կարեն Հովհաննիսյանի