Մեկ ու կես ամիս անգիտակից վիճակում գտնվող զինծառայողը ուշքի է եկել. նա օգնության կարիք ունի

Մեկ ու կես ամիս անգիտակից վիճակում Կենտրոնական կլինիկական զինվորական հոսպիտալում գտնվող ժամկետային զինծառայող 20–ամյա Դավիթ Թադեւոսյանը ուշքի է եկել։ Այս տեղեկությունը NEWS.am–ի հետ զրույցում հայտնել է Դավիթի մայրը։ Դավիթ Թադեւոսյանը բանակ էր զորակոչվել Եղեգնավան գյուղից, ծառայում էր Հադրութում, հուլիսին զորացրվելու էր։ Ապրիլի 27–ին նրա առողջական վիճակը կտրուկ վատացել էր, անգիտակից վիճակում տեղափոխել էին Ստեփանակերտ, ապա Երեւան։ Սկզբում «Էրեբունի» բժշկական կենտրոնում էր, օրեր անց տեղափոխվեց Կենտրոնական կլինիկական զինվորական հոսպիտալ։

Ինչպես ավելի վաղ գրել էինք մեր նախորդ հոդվածում («20–ամյա զինծառայողը երկու շաբաթ է՝ անգիտակից վիճակում է, պատճառն անհայտ է» )  բժիշկները Դավիթի հիվանդությունը ախտորոշել էին էպիլեպտիկ ստատուս, իսկ թե ինչն էր հանգեցրել այդ ծայրահեղ ծանր վիճակին, մինչ այժմ բժիշկները պատճառը չեն հայտնաբերել։

Հոսպիտալի վերակենդանացման բաժանմունքի վարիչ Գայանե Հովհաննիսյանը մեզ հետ զրույցում նշեց, որ Դավիթ Թադեւոսյանի առողջական վիճակը միջին ծանրության է։

«Վիճակը միջին ծանրության է, վաղը նա տեղափոխվում է նյարդաբանական բաժանմունք։ Դավիթի մոտ ախտորոշվել էր էպիլեպտիկ ստատուս, հիմա արդեն գեներալիզացված ցնցումներ չկան, բայց մկանային ցնցումներ դեպքի հատվածում կան։ Դավիթը պետք է շարունակի բուժումը, հիմնականում հաբերի տեսքով»,–մանրամասնեց Գայանե Հովհաննիսյանը։ Նյարդաբանական բաժին տեղափոխվելուց հետո Դավիթը շարունակելու է վերականգնողական բուժումը։

Տիկին Հասմիկը մեզ ասաց, որ մտադիր է որդու բուժումը շարունակել արտերկրում, եթե դրա համար անհրաժեշտ գումարը գտնվի։ Ընտանիքը սոցիալական ծանր պայմաններում է ապրում։ Դավիթի հայրը մահացել է մեկ տարի առաջ, բազմազավակ մայրը գործազուրկ է, նպաստի հույսին է։ Զինծառայողին օգնել ցանկացողները կարող են գումար փոխանցել Ակբա Կրեդիտ Ագրիկոլ բանկում բացված հաշվեհամարներին կամ զանգահարել մոր՝ Հասմիկ Թադեւոսյանի հեռախոսահամարով՝ 093 23 67 64։

Դրամ՝ 22 01 21860054 278

Դոլար՝ 22 01 22 36 00 21 278