Ո´չ բեռ եք վերցնում, ո´չ սակագին եք դնում, անընդհատ բյուջեից փող եք ուզում. վարչապետը՝ Տավուշում
Հասարակություն
Ո´չ բեռ եք վերցնում, ո´չ սակագին եք դնում, ո´չ կանոնակարգում եք եւ անընդհատ հանրապետական բյուջեից գումար եք ուզում: Այս մասին Դիլիջան քաղաքում տեղի ունեցած խորհրդակցության ընթացքում նշել է ՀՀ վարչապետ Կարեն Կարապետյանը՝ անդրադառնալով համայնքների սեփական եկամուտների եւ աղբահանության ոլորտում հավաքագրման ծավալների ցածր մակարդակին:
«Սակագները, որոնց մասին խոսում ենք, լրացուցիչ կամ անհաղթահարելի բեռ մեր քաղաքացիների համար չեն կազմում: Հետեւաբար, այստեղ չկանոնակարգված դաշտ է: Ո´չ բեռ եք վերցնում, ո´չ սակագինը եք դնում, ո´չ կանոնակարգում եք եւ անընդհատ հանրապետական բյուջեից գումար եք ուզում: Մենք էլ պարզ ձեւակերպել ենք, որ յուրաքանչյուր համայնքի սուբսիդավորումն իրականացնելու ենք հետեւյալ սկզբունքով. ամենաշատը՝ ոչ թե ամենախեղճին, այլ ամենաշատ գործ անողին, բեռ վերցնողին»,-ընդգծել է Կարեն Կարապետյանը:
Կառավարության ղեկավարը հանձնարարել է մարզպետին աշխատել շահագրգիռ գերատեսչությունների հետ եւ սեղմ ժամկետում ներկայացնել վերլուծություն՝ յուրաքանչյուր համայնքից սեփական եկամուտների եւ աղբահանության գումարների ակնկալվող ծավալների վերաբերյալ:
Վարչապետին զեկուցվել է Տավուշի մարզում գյուղատնտեսության, առողջապահության, կրթության, զբոսաշրջության ոլորտներում իրավիճակի եւ առկա խնդիրների լուծման ուղղությամբ տարվող աշխատանքների վերաբերյալ: Մասնավորապես, տեղեկատվություն է ներկայացվել ինտենսիվ այգիների հիմնման, զբոսաշրջային ենթակառուցվածքների բարելավման, կրթական եւ առողջապահական համակարգերի գործունեության եւ օպտիմալացման աշխատանքների մասին:
Գյուղատնտեսության եւ բնապահպանության վարչության պետը զեկուցել է, որ մարզի տարածքում վերջին տարիներին հիմնվել են 22.3 հա ինտենսիվ պտղատու այգիներ: Տնկարանային տնտեսություն ստեղծելու դեպքում այդ այգիները կարելի է ավելացնել՝ տարեկան 50 հա:
Վարչապետը նշել է, որ վերլուծությունների եւ հաշվարկների համաձայն, գյուղատնտեսության ոլորտում ինտենսիվ այգիների հիմնումը հեռանկարային է, եւ ՀՆԱ-ի մեջ մեծ աճ է ապահովելու:
1
2
3
4
5
1
2
3
4
5
1
2
3
4
5
