Թուրքիայում հայերի հետքերը փնտրող` BBC–ի հայ եւ թուրք լրագրողները համատեղ ֆիլմ են նկարահանել

Մեդիա նախաձեռնությունների կենտրոնում այսօր` հուլիսի 22–ին, կայացավ BBC-ի լրագրող Լարա Պետրոսյանի նկարահանած «Հիշելով հայկական ջարդերը» (Remembering the Armenian Massacres) վավերագրական ֆիլմի ցուցադրությունը։

Ցեղասպանության 100–ամյակին նվիրված ֆիլմն այս տարվա ապրիլի 24-ին հեռարձակվել էր BBC WORLD NEWS, BBC NEWS CHANNEL, BBC PERSIAN TV հեռուստաալիքներով։  Այն նաև ներբեռնվել է BBC-ի թուրքական ծառայության յութուբյան էջում։

Ֆիլմում  Լարա Պետրոսյանը այցելում է Թուրքիա և փորձում Արևմտյան Հայաստանի նախկին հայաշատ քաղաքներում գտնել 100 տարի առաջ այստեղ ապրած հայերի հետքերը։

Լարա Պետրոսյանին միանում է «BBC Թուրքիա»-ի լրագրող Ռենջին Արսլանը, որին նույնպես հուզում է այն հարցը, թե իրականում ինչ է կատարվել  հարյուր տարի առաջ իր երկրում ապրող հայերի հետ։ Ֆիլմում անդրադարձ է կատարվում նաև իսլամացած հայերին, ովքեր դեռևս ֆիզիկական վտանգից խուսափելու համար թաքցնում են, որ իրենց նախնիները հայեր են եղել։ Բացի Էսկիշեիր քաղաքից, որտեղ կատարվել են ֆիլմի հիմնական նկարահանումները, լրագրողներն աշխատել են նաև Վանում, Մուշում, Ստամբուլում և Արարատ լեռան ստորոտին։ Ֆիլմը նախապատրաստվել և նկարահանվել է յոթ շաբաթում։

Ֆիլմը անգլերեն է, սակայն հեղինակը պլանավորում է այն թարգմանել նաև հայերեն։

Աղբյուրը՝ NEWS.am