Լևոն Մնացականյանը միջազգային հանրությանը ցույց է տալիս, որ համբերության բաժակը լցվել է, զիջումներ չեն լինելու. Գ. Իսագուլյան

Ադրբեջանին պետք է պատժել՝ ցույց տալով, որ հայկական կողմի համբերության բաժակը լցվել է, տեղի տալու ցանկության չունի և ցանկացած սադրանք Ադրբեջանի համար ծանր  հետևանքներ է ունենալու: 

Այս մասին Tert.am-ի հետ զրույցում ասաց Հայաստանում Արցախի Հանրապետության մշտական ներկայացուցչության խորհրդական-խորհրդատու Գառնիկ Իսագուլյանը՝ հավելով, որ հենց սա է նկատի ունեցել նաև Արցախի Հանրապետության պաշտպանության բանակի հրամանատար, գեներալ-լեյտենանտ Լևոն Մնացականյանը հայտարարելով, եթե նոր  հարձակում լինի, ջախջախիչ հակադարձման ենք անցնելու, ընդլայնելու ենք, այսօրվա գոյություն ունեցող անվտանգության գոտու լայնությունը և անվտանգության գոտու խորությունը, միանշանակ, 2016թ–ի ապրիլին  հակառակորդի հսկողության տակ անցած սահմանափակ հենակետերը վերականգնվելու են:

Գառնիկ Իսագուլյանի դիտարկմամբ՝ Լևոն Մնացականյանի հայտարարության նման  հայտարարություններ արվել են նաև ԱՀ, ՀՀ նախագահների կողմից հատկապես 2016-ի ապրիլյան գործողություններից հետո:

«Նախագահի այն հայտարարությունը, որ աչք չի թարթի Իսկանդերը օգտագործելու համար, եթե դրա անհրաժեշտությունը լինի, ևս այդ մասին է խոսում, պարզապես Լևոն Մնացականյանը ուղիղ տեքստով և շատ հստակ ի լուր ոչ միայն Հայաստանի, Արցախի, Ադրբեջանի հանրությանը, այլև բոլորի, հատկապես միջազգային հանրությանը, արցախյան հիմնախնդրով զբաղվողներին ասաց, որ Ադրբեջանին այս անգամ չենք ներելու»,- ընդգծեց նա:

Գառնիկ Իսագուլյանը չբացառեց նաև, որ Լևոն Մնացականյանը նախազգուշացնում է մոտ ժամանակահատվածում պատերազմական գործողությունների վերսկսման մասին՝ ելնելով Ադրբեջանի վարքագծից:

«Վերջին իրադարձությունները ցույց են տալիս, որ Ադրբեջանը, բացի ռազմատենչ հայտարարություններից անցել է նաև գործողություների։ Իրեն թվում է, որ Իսրայելից  5 մլրդ-ի զենք է գնել, համարյա նույնքան ՌԴ-ից, կարող է լայնամասշտաբ գործողությունների դիմել և լուծել իր առաջ դրված խնդիրը: Բայց ինչպես ապրիլին չհաջողեց, հիմա էլ չի հաջողելու, իրենք տասնապատիկ ավելի զոհեր ունեցան, բայց իհարկե մեզ համար ամեն մի զոհը թանկ է»,– ասաց նա:

Գառնիկ Իսագուլյանն ընդգծեց, որ ապրիլյան պատերազմի ժամանակահատվածում էլ հայկական կողմն ամբողջ աշխարհին ցույց տվեց, որ մենք միշտ պատրաստ ենք խաղաղության՝ անսալով Ադրբեջանի խնդրանքներին կրակի դադարեցման շուրջ պայմանավորվածություն ձեռք բերվեց, բայց հակառակորդի վարքագիծը չփոխվեց:

«Արդեն մի քանի անգամ ասել եմ՝ մինչև ապրիլյանի դեպքերը ադրբեջանական կողմը Կասպրշիկի միջոցով խնդրել էր, որպեսզի իրենց Ռամադանի օրերին հայկական կողմն ամեն ինչ անի, որպեսզի Ադրբեջանն ամիսը լավ անցկացնի, բայց հենց իրենք էին գնացել ուխտադրուժ գործողություններին, ինչ-որ տեղ փորձել էինք հավատալ  Ադրբեջանին հավատալ բայց...»,- ասաց նա: 

Գառնիկ Իսագուլյանի դիտարկմամբ՝ թե՛ Հայաստանին, թե՛ Ադրբեջանին, և թե՛ ԵԱՀԿ Մինսկի համանախագահներին Արցախում ձեռնտու է ստատուս քվոյի պահպանումը: «Ստատուս քվոյի ցանկացած փոփոխություն բերելու է անկանխատեսելի հետևանքների և անվտանգության պարատդրող կարգավիճակը, որը այսօր ունի Արցախը, կվերածվի սպառողի»,- շեշտեց նա:

Քաղաքագետի դիտարկմամբ՝ առանց արտաքին ուժի ներկայության Արցախը կարողանում է իր անվտանգությունն ապահովել՝ համապատասխան ենթակառուցվածքները կան, դեռ 90-ականներին կարողացավ հաղթել Ադրբեջանին պարտադրված պատերազմում:

«Այսօր մեր տարածաշրջանում այսօր անվտանգությունն ու կայունությունը պահպանում է հենց Արցախը»- շեշտեց նա:

Գառնիկ Իսագուլյանը ընդգծեց, որ հայկական կողմը խաղաղության ձգտելով արդեն իսկ իրականացնում է նաև կանխարգելիչ, պատժիչ գործողություններ:


Մանրամասները՝տեսանյութում