ԱՄՆ-ն դժվար թե տնտեսական պատժամիջոցներ սահմանի ԵԱՏՄ անդամների դեմ, որովհետև անգամ ԵՄ-ն չի ողջունում դրանք. Ստանիսլավ Տարասով
Ռուսաստանի և ԱՄՆ հարաբերությունները բարդանում են, օրեցoր լարվում: Այս մասին Tert.am-ի հետ զրույցում ասաց Մերձավոր Արևելքի և Կովկասի երկրների հարցերով ռուսաստանցի փորձագետ Ստանիսլավ Տարասովը՝ խոսելով ռուս-ամերիկյան ներկայիս հարաբերությունների մասին:
Միաժամանակ, Ստանիսլավ Տարասովն ասաց, որ կողմերը աշխատում են կամուրջները չայրելու ուղղությամբ:
«Թե ԱՄՆ-ից, թե ՌԴ-ից եղել են հայտարարություններ, որոնց ենթատեքստը հենց դա է եղել, որ չենք ուզում այրել կամուրջները: Բայց երկու կողմերն էլ հասկանում են, որ բավական երկար ժամանակ է պետք հարաբերությունները վերականգնելու կամ գոնե դրանք լարված փուլից հանելու համար»,- ասաց Ստանիսլավ Տարասովը:
Ըստ փորձագետի՝ Պուտին-Թրամփ համբուրգյան հանդիպումը, որը դրական ակնկալիքներ էր խոստանում ՌԴ-ԱՄՆ հարաբերությունների կարգավորման համար, մնաց անցյալում, որովհետև ներկայում ԱՄՆ ներսում լուրջ պայքար է ընթանում: «Բայց ես չեմ կարծում, որ մեծ պատերազմ կլինի»,- շեշտեց Ստանիսլավ Տարասովը:
Ինչ վերաբերում է կարծիքներին, թե ԱՄՆ-ն տնտեսական պատժամիջոցներ կարող է կիրառել նաև Եվրասիական տնտեսական միության անդամների նկատմամբ, Ստանիսլավ Տարասովն ասաց, թե դժվար թե նման զարգացումներ լինեն, որովհետև անգամ Եվրոպական միությունն է բացասաբար գնահատել ԱՄՆ քայլը:
«Տնտեսական պատժամիջոցները ՌԴ նկատմամբ ազդում են ԵՄ վրա էլ: ԵՄ-ն չի ցանկանա խզել իր հարաբերությունները Ռուսաստանի հետ: ԱՄՆ-ն ցանկանում է թակարդը գցել Ռուսաստանին»,- նշեց Ս. Տարասովը:
Փորձագետն առանձնացրեց նաև ԱՄՆ ներսում տիրող իրավիճակը: Նա հիշեցրեց, որ Թրամփը դեմ էր ՌԴ նկատմամբ պատժամիջոցներ կիրառելուն, բայց ԱՄՆ Կոնգրեսը չհամաձայնեց նախագահի հետ ու Դոնալդ Թրամփը ստիպված էր ենթարկվել խաղի կանոններին: Տարասովի խոսքով՝ ԱՄՆ ներքին խմորումները կարող են տարբեր զարգացումներ ունենալ, ինչից էլ կախված կլինեն ԱՄՆ-ՌԴ հետագա զարգացումները:
«ՌԴ-ն էլ, ԱՄՆ-ն էլ ուզում են, ունեն ցանկություն հարաբերությունները լավացնելու, բայց… Դա կախված է երկու պետությունների պահվածքից, վերաբերմունքից միմյանց նկատմամբ»,- ասաց Տարասովը:
1
2
3
4
5
4
2
3
4
5
