Սոֆյա Պողոսյան. «4 տարվա դադարից հետո ես և Աշոտը կրկին ներկայանում ենք որպես սիրային զույգ». life.tert.am

Life.tert.am-ը գրում է . 

Արագ զարգացումներով դետեկտիվ դրամա, որն արդեն հասցրել է դառնալ համացանցային քննարկման առարկա. Tert.am Life–ն իր ընթերցողներին պատմել է «Միլիոնը թակարդում» 25–մասանոց նոր հեռուստանովելի մասին, որը Ucom ցանցում գործող «Արմենիա Պրեմիում» հեռուստաալիքի եթերում կլինի սեպտեմբերի 4–ից։

«Միլիոնը թակարդում» նախագծի պրոդյուսեր Արա Բաղդասարյանի խոսքով` սա դետեկտիվ դրամա է, որը տարբերվելու է սցենարային կառուցվածքով, դինամիկ զարգացումներով ու խճճված ինտրիգներով։ Նկարահանման որակը, օգտագործված միջոցների քանակն ու դերասանական լավ կազմը կապահովեն նախագծի բարձր որակը:

«Ucom ընկերության համար սեպտեմբերը նոր առաջարկների և նոր նախագծերի մեկնարկն է ազդարարում: Ուրախ ենք, որ «Արմենիա Պրեմիումի» հավատարիմ հեռուստադիտողներին կայուն պարբերականությամբ հնարավորություն է ընձեռվում վայելելու հայկական հեռուստատեսության նորագույն ու որակյալ արտադրանքը», — նշեց Ucom ընկերության գլխավոր տնօրեն Հայկ Եսայանը։

Tert.am Life–ին տված հարցազրույցում Սոֆյա Պողոսյանը նշեց, որ իր, Աշոտ Տեր–Մաթևոսյանի և Հայկ Սարգսյանի մասնակցությամբ նոր հեռուստասերիալն իրեն գրավել է ոչ միայն որպես դերասանուհու, այլև հեռուստադիտողի։ Ասում է` կհետևեր սերիալի ընթացքին, եթե, անգամ, չխաղար այստեղ։ Որպես գլխավոր արժանիք` Սոֆյան նշում է կուռ սցենարը.  «Կարծում եմ` առաջին հերթին սցենարն է շատ հետաքրքիր` ձգձգվող ու ձանձրալի չէ։ Հայկական սցենար է, որը որևէ տեղից  վերցված և ադապտացված չէ։ Նոր գաղափար է, չկան ծեծված տեսարաններ։ Ինքս, լինելով այս ասպարեզում, որոշ բաներից սկսել եմ ձանձրանալ։ Այդ առումով այս նախագիծը շատ հետաքրքիր էր. դինամիկ  զարգացող դետեկտիվ ֆիլմ է»։

Դետեկտիվ դրաման սկսվում է սպանությամբ, որի հետևանքով հարգված փաստաբանը, որին մարմնավորում է Սոֆյան, հայտնվում է ճաղերից այն կողմ։ Որոշ բացահայտումներ հեռուստադիտողների համար նախապես են արվում, որոշներն էլ նրանք կանեն հընթացս` հերոսների հետ` փորձելով սեփական տրամաբանության միջոցով բացահայտել խճճված պատմությունը։

Այս անգամ Սոֆյան ոչ թե կինոյի աղջնակն է, այլ 40-ամյա հասուն կին, որն ունի ձևավորված «ես», հստակ աշխարհայացք։ Նա ունի ընտանիք` ամուսին, որին մարմնավորում է Հայկ Սարգսյանը և 17–ամյա դուստր, որին մարմնավորում է Եվա Զոհրաբյանը։ «Հերոսուհիս կարծում է, թե ունի դասավորված կյանք, սակայն ճակատագրի բերումով հայտնվում է անսպասելի իրավիճակում, որը նրան դրդում է ծայրահեղ քայլի։ Ուրախ եմ, որ հենց ինձ են վստահել կայացած կնոջ այս դերը։ Հայաստանում միտում կա դերասանին առաջարկել այնպիսի դերեր, ինչպիսիք արդեն խաղացել է։ Այս կերպարը տարբերվող էր իմ մյուս դերերից, ինչը շատ հետաքրքրեց ինձ։ Այս տարիների ընթացքում ես էլ նույնը չեմ մնացել։ Բնականաբար, և՛ տարիքով եմ մեծացել, և՛ մտածելակերպով։ Հերոսուհիս տարբերվում է կինոյի աղջկա իմ կերպարից, ինքս էլ դուրս եմ եկել դրանից»,– նկատեց դերասանուհին։

Սոֆյայի խոսքով` ունեցել են էշքըն նկարահանումներ, որոնք տեսարժան կլինեն հեռուստադիտողների համար։ Իր համար ամենաբարդը եղել է ինքնասպանության փորձի տեսարանը. «Կա կախվելու տեսարան, որը, պարզվեց, ֆիզիկական պատրաստվածություն էր պահանջում։ Քանի որ տեսարանը «կեղծ» չենք նկարահանել, բավականին բարդ ստացվեց։ Իհարկե, կան տեսարաններ, որոնք ստանալը բարդ էր, սակայն նկարահանման ընթացքում շատ զվարճալի իրավիճակներ են լինում, որոնք հեշտացնում են աշխատանքը։ Ինձ շատ հաճելի էր աշխատել այս թիմի հետ»։

Ֆիլմում Սոֆյա Պողոսյանի և Աշոտ Տեր Մաթևոսյանի հերոսների միջև սիրային գիծ կա։ Ինչպես արդեն հայտնի է, օրեր առաջ լայն տարածում գտած Աշոտի և Սոֆյայի համբույրի տեսանյութը հենց այս ֆիլմից է։ Նրանց` ամիսներ շարունակ քննարկվող սիրավեպի խոսակցություններն այսպիսով նոր թափ են ստանում, սակայն դա դերասաններին չի խանգարել համաձայնել խաղալ սիրային զույգի։ «Ես անձնական կյանքը լիովին տարանջատում եմ գործնականից։ Նույնիսկ այն ժամանակ, երբ այդ թեմաները չէին պտտվում, մարդիկ, միևնույն է, խոսում էին, թե նման բան կա։ Եթե դերասանները խաղում են միասին, պարտադիր լուրեր են պտտվում , որ նրանք միասին են։ Ես և Աշոտը 4 տարի առաջ ենք խաղացել սիրահար զույգի։ Այս տարիների ընթացքում խաղացել ենք միասին, սակայն որպես զույգ, կրկին ներկայանում ենք 4 տարվա դադարից հետո։ Ես միայն ուրախ եմ դրա համար, որովհետև շատ կարևոր է` ով է զուգընկերդ։ Որպես դերասանուհի` շատ եմ կարևորում էներգետիկ փոխադարձ կապը, խաղընկերոջիցս ստացած ազդակները։ Հաճախ, խաղընկերդ քեզ չի փոխանցում այն էմոցիաները, որոնք պետք է փոխանցի ըստ կերպարի։ Տարիների մեր փորձը շատ դրական է ազդում նկարահանման ընթացքի վրա։ Քեզ շատ հարմարավետ ես զգում Անձնականը մի կողմ դնելով` պետք է նշեմ, որ որպես խաղընկեր` ինձ շատ հարմարավետ է խաղալ Աշոտի հետ»,– ասաց նա։

Հիմա Սոֆյայի մոտ հանգստի փուլ է։ Նախագծի նկարահանումներն ավարտվել են, սակայն նոր աշխատանքի դեռևս չի անցել։ Ասում է` կան առաջարկներ, որոնք քննարկման ընթացքի մեջ են։