Մենք գիտենք , թե ինչ է հակամարտությունը , եւ մեր սկզբունքն ունենք ԼՂ հարցում. Իգոր Ցրնադակի

ՀՀ ԱԺ նախագահ Արա Բաբլոյանը օգոստոսի 31-ին ընդունել է Բոսնիա եւ Հերցեգովինայի արտաքին գործերի նախարար Իգոր Ցրնադակին:

Հայաստանի ԱԺ-ից NEWS.am-ին հայտնում են, որ ողջունելով նախարարին ՀՀ Ազգային ժողովում՝ Արա Բաբլոյանը նշել է, որ Հայաստանը հետաքրքրված է Բալկանյան երկրների հետ հարաբերությունների սերտացմամբ, սակայն Բոսնիա եւ Հերցեգովինայի հետ համագործակցությունն այսօր բավարար մակարդակի վրա չէ:

ՀՀ ԱԺ նախագահը հույս է հայտնել, որ արտաքին գործերի նախարարի այցը կակտիվացնի միջպետական երկխոսությունը:

Արա Բաբլոյանը, կարեւորելով երկու երկրների միջեւ միջխորհրդարանական կապերի հաստատումը, նշել է, որ ՀՀ Ազգային ժողովում առաջիկայում կքննարկվի Հայաստան-Բոսնիա եւ Հերցեգովինա բարեկամական խմբի ստեղծման հարցը:

ՀՀ ԱԺ նախագահն անդրադարձել է նաեւ միջազգային ատյաններում եւ խորհրդարանական հարթակներում երկու երկրների համագործակցության եւ պատվիրակությունների միջեւ կառուցողական ու փոխշահավետ երկխոսության հնարավորությանը:

Անդրադառնալով տարածաշրջանային խնդիրներին եւ Հայաստանի արտաքին քաղաքականության առաջնահերթություններին՝ Արա Բաբլոյանը փաստել է, որ ԼՂ հակամարտության կարգավորումը Հայաստանը տեսնում է միմիայն ԵԱՀԿ Մինսկի խմբի ձեւաչափում:

ՀՀ ԱԺ նախագահն իր խոսքում նշել է. «Հավասարապես ցավում եմ երկու կողմերի կորուստների համար, որոնք անիմաստ են, քանի որ դեռ չկա դիվանագիտական լուծում: Հայաստանը ձգտում է տարածաշրջանում հաստատել եւ պահպանել բարիդրացիական հարաբերություններ»:

Բոսնիա եւ Հերցեգովինայի արտաքին գործերի նախարարն Արա Բաբլոյանին ներկայացրել է իր երկրի խորհրդարանի եւ կառավարության կառուցվածքը, պետական կառավարման մարմինների գործունեության առանձնահատկությունները:

Կարեւորելով հարաբերությունները տարածաշրջանում՝ Իգոր Ցրնադակն անդրադարձել է իր երկրում քառամյա պատերազմից հետո խաղաղության եւ քաղաքական հավասարակշռության հաստատմանը:

Նախարարը, ընդգծելով երկու երկրների համար էլ հարեւանների հետ հարաբերությունների ամրապնդման կարեւորությունը, նշել է. «Մենք գիտենք, թե ինչ է հակամարտությունը, եւ մեր սկզբունքն ունենք ԼՂ հակամարտության վերաբերյալ՝ աջակցել ԵԱՀԿ Մինսկի խմբի ջանքերին: Հուսով ենք, որ այդ հարցի լուծումը կբխի երկու երկրների, ինչպես նաեւ տարածաշրջանի շահերից»:

Հանդիպման ավարտին զրուցակիցներն անդրադարձել են երկու երկրների միջեւ համագործակցության հեռանկարներին, ԵՄ-ի հետ հարաբերությունների հետագա զարգացմանը եւ միջխորհրդարանական կապերի ակտիվացմանն առնչվող հարցերին: