Պուտինը հնարավոր է համարել ԱՄՆ դիվանագիտական առաքելության աշխատակիցների թվի եւս 155 մարդով կրճատումը

Ռուսաստանն իրեն իրավունք է վերապահում ԱՄՆ դիվանագիտական առաքելության աշխատակիցների թիվը եւս 155 մարդով կրճատել լիակատար պարիտետի համար, սակայն դա դեռեւս չի իրականացնի: Այս մասին ՌԴ նախագահ Վլադիմիր Պուտինը հայտարարել է ԲՐԻԿՍ գագաթնաժողովի արդյունքներով մամուլի ասուլիսի ժամանակ, փոխանցում է «ՌԻԱ Նովոստի»-ն:

«Եթե խոսելու լնենք լիակատար պարիտետի մասին, ապա Մոսկվայում ԱՄՆ ոչ թե 455 դիվանագետներ պետք է լինեն, այլ մինուս 155: Այնպես որ, մենք մեզ իրավունք ենք վերապահում որոշում ընդունել նաեւ Մոսկվայում ամերիկացի դիվանագետների այս թվի վերաբերյալ, սակայն դա դեռեւս չենք անի, կտեսնենք, թե իրավիճակն ինչպես է հետագայում զարգանում»,- ասել է Պուտինը:

Նրա խոսքով՝ ԱՄՆ-ում աշխատող ռուս դիվանագետների թվի մեջ էին ներառված նաեւ ՄԱԿ-ում ՌԴ մշտական ներկայացուցչության աշխատակիցները: «Բանն այն է, որ մեր գործընկերների հետ պայմանավորվել էինք, որ մեր աշխատակիցների, Ռուսաստանում եւ Միացյալ Նահանգներում դիվանագիտական աշխատակիցների թիվը պետք է պարիտետային լինի: Իմ կարծիքով՝ Ռուսաստանում աշխատում էր 1300 դիվանագետ, Միացյալ Նահանգներում մենք 455 դիվանագետ ունեինք: Ցանկանում եմ ձեր ուշադրությունը հրավիրել այն հանգամանքի վրա, որ Միացյալ Նահանգներում գործունեություն իրականացնող այս 455 դիվանագիտական աշխատակիցների մեջ էինք ներառել նաեւ ՄԱԿ-ին առնընթեր աշխատող 155 մարդու: Խստորեն ասած՝ նրանք ԱՄՆ Պետքարտուղարությունում լիազորված դիվանագետներ չեն, այլ միջազգային կազմակերպություններում աշխատող դիվանագետներ են»,- պարզաբանել է Պուտինը:

Նա հիշեցրել է, որ ԱՄՆ-ն պարտավորություն էր ստանձնել ապահովելու ՄԱԿ աշխատանքը, երբ պայքարում էր, որպեսզի կազմակերպության կենտրոնակայանը Նյու Յորքում տեղակայվի: