Միայն ժողովրդավարական Թուրքիան կարող է ճանաչել Հայոց ցեղասպանությունը. Կարո Փայլանի ելույթը՝ Երեւանում

Առանց Ցեղասպանությունը ճանաչելու՝ Թուրքիան երբեք ժողովրդավարական պետություն չի դառնա, ոչ էլ քրդական հարցը լուծում կստանա: Այս մասին այսօր՝ սեպտեմբերի 19-ին, Հայաստան-Սփյուռք համահայկական 6-րդ համաժողովի շրջանակում կազմակերպված «Հայոց ցեղասպանության ճանաչում, ցեղասպանությունների կանխարգելում, քաղաքական և իրավական գործընթացները» թեմայով քննարկման ժամանակ ասաց Թուրքիայի Հանրապետության խորհրդարանի հայ պատգամավոր Կարո Փայլանը:

«Ցեղասպանության ճանաչման համար առավել լայն տեսլական պետք է ունենանք, միայն ժողովրդավարական Թուրքիան կարող է ճանաչել Ցեղասպանությունը, միայն ժողովրդավարական Թուրքիան կարող է բացել սահմանները Հայաստանի հետ, հակառակ դեպքում մենք ստիպված կլինենք եւս տասնյակ տարիներ սպասել: Թուրքիան ներկայումս կրկին մութ ժամանակաշրջան է ապրում, 102 տարի առաջ մեծ ոճիր տեղի ունեցավ, եւ այն շարունակվում է այսօր, քանի որ յուրաքանչյուր ոճիր, որն անպատիժ է մնում, նոր ոճիր է առաջացնում: Ինքս շարունակելու եմ պայքարել Ցեղասպանույան ճանաչման համար»,- ասաց հայազգի պատգամավորը:

Կարո Փայլանի խոսքով, Թուրքիան այսօր հեռանում է ժողովրդավարությունից, հետընթաց է ապրում նաեւ ԵՄ-ի հետ հարաբերություններում: Նրա կարծիքով, Թուրքիայի նոր Սահմանադրության ընդունումը նույնպես նշանակում է՝ հեռացում ժողովրդավարությունից. «Ես այս մասին եմ հենց խորհրդարանում եմ խոսել, ասել եմ, որ մեծ սխալ է տեղի ունեցել: 20-րդ դարի սկզբին տեղի ունեցավ Հայոց ցեղասպանությունը, ինքս խորհրդարանում ասել եմ՝ եթե երկրում ընդունվի նոր Սահմանադրություն, նույն աղետը կունենանք, այսօր հենց դրա ճանապարհին ենք: Թուրքիան 100 տարի անց էլ շարունակում է ոճիր գործել»: