Հայ աuտղերն ու աuտղային մայրիկները. աuեu քnւյրեր լինեն . ֆոտոշարք

Ցույց տվեք մի կնոջ, որը չի ցանկանում երիտասարդ երևալ: Բարեբախտաբար, վերջին բժշկա-կոսմետիկական նորամուծություններն այդ առումով լայն հնարավորություններ են ընձեռում, սակայն պատահում է նաև, երբ, ասենք, մայրն իր բնատուր հմայքով ու թարմությամբ ամենևին չի զիջում դստերը: Մայրության և գեղեցկության տոնի նախօրեին ներկայացնում ենք մի շարք ճանաչված կանանց և աղջիկների, որոնք իրենց մայրերին վստահորեն կարող են իբրև քույր ներկայանալ:

Իրոք որ, անվանի օպերային երգչուհի Արաքս Մանսուրյանին նայելով` դժվար է հավատալ, որ նա արդեն բոլորել է 60-ամյակը: Չես ասի նաև, որ նրա և ավագ դստեր` երգչուհի, ԱԺ պատգամավոր Շուշան Պետրոսյանի միջև տարիքային տարբերությունը 21 տարի է: «Մենք ասես ընկերուհիներ լինենք: Դրա հետ մեկտեղ մայրս եղել և մնում է կանացիության, ազնվականության, իմաստության չափանիշ: Մինչ օրս նրա թանկ խորհուրդներով եմ ապրում, որոնք առաջին հերթին ձևավորեցին ինձ որպես մարդու, որպես արժանապատիվ հայի»,- ասում է դուստրը:

Տիկին Արաքսից դուստրը նաև սովորել է լավ մայր լինել: «Նուրբ ու երբեմն ոչ երկրային թվացող մայրս անչափ ուժեղ ու լավատես էր,- ասում է Շուշանը, ապա, հիշելով 1990-ականների մութ ու ցուրտ տարիները, շարունակում,- առավոտները վաղ արթնանում էր, վառում վառարանը, նախաճաշ պատրաստում, տաք ջրով լցնում թերմոսները, տաքացնում շալերը, որ արթնանալուն պես բոլորիս փաթաթի, որ չմրսենք: Մեզնից բացի հոգ էր տանում նաև տատիս մասին, որին բերել էր մեզ մոտ: Մայրս երգով, կատակներով արթնացնում էր բոլորիս ու վազում կոնսերվատորիա` դասավանդելու, կամ օպերային թատրոն` փորձի: Ու երբ երեկոյան փայլում էր բեմում, թեև, ցավոք, քիչ ներկայացումներում էր երգում, երբեք չէիր ասի, թե այս նուրբ, փխրուն էակն ի՜նչ գերբնական ուժ ունի»,- ասում է դուստրը:

Սերիալային դերասանուհի Ալինա Մարտիրոսյանն ուրախ է, որ մորից` Ռիտա Տեր-Կարապետյանից, արտաքին ինչ-ինչ տվյալներ է ժառանգել` կազմվածքը, ճակատը, շրթունքները… «Հուսով եմ` նաև նրա նման երկար երիտասարդ կմնամ»,- ժպտում է դուստրը: Ի դեպ, շատերը, տեսնելով Ալինային մոր ընկերակցությամբ ու լսելով նրանց ազգակցական կապի մասին, տարակուսում են` չի՛ կարող պատահել… Հաճախ էլ հարցնում են` քույրե՞ր եք… Վերջերս, հոգնելով այդ հարցին պատասխանելուց, լուրջ դեմքով ասացի` ո՛չ, ես նրա մայրն եմ»,- ժպտում է Ալինան:

Նշենք, որ տիկին Ռիտան դստերից ընդամենը 19 տարով է մեծ: «Նա իմ ամենամտերիմ ընկերուհին է, ում հետ անմնացորդ կիսվում եմ: Նաև խորհրդակցում եմ որևէ նոր զգեստ հագնելիս և ընդհանրապես տեսքիս վերաբերյալ: Ի դեպ, այդ առումով նա ինձնից էլ քմահաճ է: Նաև նուրբ ճաշակ ունի. մասնագիտությամբ երաժիշտ և պարուհի է, թեև այժմ մատնահարդար է աշխատում»,- ասում է դերասանուհին:

Մոր արժանիքներից Ալինան նշում է նաև հնարամտությունն ու հումորը: «Հիշում եմ` երբ դեռ փոքր էի, կույր աղիի վիրահատությունից հետո նա էր ինձ հիվանդանոցում խնամում: Ու երբ պետքարան ուզեցի, նա ձեռքս բռնած ուղեկցեց դեպի մոտակա սանհանգույցը, որը, ինչպես պարզվեց, տղամարդկանց էր: Ասացի` չեմ մտնի` դռան վրա տաբատով մարդ է նկարված: Մայրս էլ, իրեն չկորցնելով, ասաց. «Ոչինչ, մենք էլ ենք տաբատ հագնում»: Ապա խոստովանեց` ես արդեն երկու օր է` այստեղ եմ մտնում… Այնքան ծիծաղեցի, քիչ էր մնում կարերս բացվեին»,- կրկին ծիծաղելով պատմեց Ալինան:

Հաղորդավարուհի և դերասանուհի Դիանա Մալենկոյի և նրա մոր` Գայանե Աթաբեկովա-Մալենկոյի միջև տարիքային տարբերությունը 24 տարի է: «Այնուամենայնիվ, երբ ես ու քույրս մորս հետ քայլում ենք փողոցում, ասես 3 քույր լինենք: Բացի այդ, ավելի շատ մեզ միավորում են ընկերական, քան ծնող ու դուստր հարաբերությունները: Ես մորիցս գաղտնիքներ չունեմ, նա իմ օգնականն է թե՛ կենցաղում, թե՛ ընդհանրապես կյանքում: Մայրս (մասնագիտությամբ համակարգչային մոնտաժող է — հեղ.) ինձ անընդհատ խորհուրդ է տալիս, որ չսպառեմ ինձ և հետևեմ առողջությանս: Ցավոք, վերջին խորհրդին այնքան էլ չի հաջողվում հետևել, բայց մնացած բոլոր հարցերում հետևողական եմ»,- ասում է Դիանան:

Հաղորդավարուհու խոսքով` տնեցիները մայրիկին «երկաթե լեդի» են անվանում, ընդ որում, նա այդպիսին է բառի բուն իմաստով: «Չնայած նուրբ արտաքինին` չգիտես ինչպես նրան անընդհատ «հաջողվում» է երկաթե իրեր կոտրել` խոհանոցի պարագաներ, կենցաղային սարքավորումներ… Իսկ երբ մի անգամ նա ոչ միտումնավոր երկաթե դուռը կոտրելով բացեց, հայրս եզրակացրեց. «Գայանեից պետք է զգուշանալ…»,- ժպտում  է Դիանան:

Թեև սերիալային դերասանուհի Լիկա Սալմանյանին իր մորից` Նատալի Կոռնիենկոյից, հարյուրավոր կիլոմետրեր են բաժանում, սակայն դա չի խանգարում նրանց շարունակել մտերմությունը, որը բնորոշ է ոչ միայն մորն ու դստերը, այլև ընկերուհիներին կամ հարազատ քույրերին: «Մայրս ապրում է Ուկրաինայում (մասնագիտությամբ նկարչուհի է — հեղ.), բայց մտքով և հոգով միշտ միասին ենք` ես ամեն հարցով կիսվում եմ նրա հետ, նա իմ խորհրդատուն է և, իհարկե, պահապան հրեշտակը»,- ասում է Լիկան: Միակ բանը, որի համար մայրս մինչ օրս կշտամբում է դստերը, նրանց բաժանումն է: «Թեև մեծ դժվարությամբ, բայց ես ընտրեցի ծնողներիցս առանձին ապրելը (Լիկայի հայրն էլ ապրում է Սոչիում- հեղ.)` Հայաստանից հեռու չեմ կարող լինել: Միևնույն ժամանակ մեր բաժանումն աննկարագրելի ցավ է երկուսիս համար: «Հարազատ թշնամի» սերիալն ավարտվելուն պես մեկնելու եմ մորս մոտ և երկար ժամանակ նրա հետ եմ լինելու»,- ասում է Լիկան:

Մոր ու դստեր տարիքային տարբերությունը 19 տարի է: Լիկայի խոսքով` երբ Երևանում իր ծանոթներն առաջին անգամ տեսնում են նրա լուսանկարները, չեն հավատում, որ իր մայրն է: Բնականաբար, դերասանուհին իր արտաքին առանձնահատկությունների համար էլ մորն է պարտական: «Իհարկե, ուկրաինական գեներն իրենց գործն արել են, բայց, պետք է ասեմ, որ հայրս էլ շատ գեղեցիկ տղամարդ է»,- ասում է Լիկան:

Սերիալային դերասանուհի Տաթևիկ Ադումյանին մայրը` Մոնիկա Կարապետյանը, լույս աշխարհ է բերել 18 տարեկանում: «Նա հրաշալի մայր է` ժամանակին էական ձեռքբերումներ գրանցելով պարարվեստում (նա բալետի պարուհի էր, միջազգային մրցույթների դափնեկիր — հեղ.), թողել է բեմը և ամբողջապես նվիրվել իր երեխաների դաստիարակությանը,- ասում է դուստրը: — Իսկ այսօր ոչ միայն հրաշալի ծնող է, այլև իմ ամենամտերիմ ընկերուհին. մենք միմյանց մասին գիտենք ամեն ինչ»:
Դերասանուհին չի թաքցնում` այն ամենին, ինչին հասել է, նաև մոր շնորհիվ է:  Տաթևիկի խոսքով` մայրն իր առաջին քննադատն է և առաջին ոգևորողը: «Միշտ հետևում եմ մորս խորհուրդներին, ինչի շնորհիվ էլ ամեն բան հաջողում եմ: Իսկ ամենից շատ գնահատում եմ այս խորհուրդը` միշտ առաջ գնա և ինչ էլ լինի կյանքում, չկոտրվես»,- ասում  է դերասանուհին: