Ֆարմանյանի ոգևորության աղբյուրները

Հանրապետական կամ գուցե երիտհանրապետական, դժվար է ասել, Սամվել Ֆարմանյանն այնքան է ոգևորվել Հայաստան-Սփյուռք համաժողովում Սերժ Սարգսյանի ելույթից, որ պատրաստվում է մոտ օրերս հանդս գալ հայտարարությամբ, դիմել դիվանագետներին, հասարակագետներին, քաղաքական գործիչներին ու մի խոսքով բոլորին, բոլորին, բոլորին, որպեսզի ձևավորվի ժողովրդագրական հարցերով զբաղվող աշխատանքային խումբ։

Եթե Ֆարմանյանի ոգևորության աղբյուրը Սերժ սարգսյանի ելույթ է եղել, ապա այստեղից կարող ենք ենթադրել, որ Ֆարմանյաին առաջարկած խումբը պետք է հարվածային նպատակներ իրականացնի՝ մեզ շատ-շատ մոտ գտնվող 2040 թվականին երկրի բնակչությունը 4 միլիոն դարձնելու համար  ( էդիկ ես չեմ ասել, Սերժ Սարգսյանն է ասել)։ Դե նախաձեռնությունը դրական է, ինչ կարող ենք ասել, Հայաստանի ժողովրդագրության խնդիրներն անշուշտ, անսպառ են, սակայն արդյոք Ֆարմաննյանն ու նրա թիմակիցները, այդպես էլ չհասկացան, որ Հայաստանի ժողովրդագրական խնդիրների, իսկ ավելի պարզ ասած արտագաղի հիմնական պատճառներից մեկն հենց իրենք են՝ իրենց կուսակցության իրականացրած ղեկավարումով ու ստեղծած հասարակական քաղաքական միջավայրով։

ԵԹե չեն հասկացել, ապա հուշում ենք՝ այո, հենց իրենք են, որ ստիպում են ՀՀ քաղաքացիներից շատերին թողնել ու հեռանալ երկրից՝ անգամ չունենալով ֆինանսական սոցիալական խնդիրներ, ուստի թող ոչ թե հերթական աշխատանքային խումբը ձևավորեն կամ հանդես գան վաղուց արդեն ձանձրացրած պաթոսախեղդ հայտարարություններով։ Իրապես փորձեն տեսնել այն միջավայրը, որն ստեղծվել է վերջին 15-20 տարիների ընթացքում, թերևս եթե կարողանան մի պահ դուրս գալ իրենց աշխատասենյակներից ու տեսնեն այդ միջավայրը, հասկանան, եթե իհարկե չգիտեն, թե ինչ հասարակական շերտեր են հեղինակել, որոնց ուսերի ու գլուխների վրայով հասել են իրենց աշխատասենյակներ, այդժամ գուցե ինչ-որ մի բան փոխվի։ Չնայած դժվար թե, քանի որ միամիտի նման, շատերս կարծում ենք, թե այնտեղ վերևներում, չգիտեն իրականության տխուր պատկերը։

Սիմոն Գալստյան