ԵՏՄ երկրների համար գործում են նոր ստանդարտներ, տնտեսվարողները պետք է ապահովեն դրանց կիրարկումը . Խալիկյան
Հասարակություն
ԵՏՄ անդամ երկրների համար գործում են նոր ստանդարտներ, որոնք ընդունվել են Եվրասիական տնտեսական հանձնաժողովի կողմից եւ անդամ երկրները պետք է ապահովեն դրանց կիրարկումը: Այս մասին այսօր՝ հոկտեմբերի 10-ին, «Եվրասիական տնտեսական միությունում տեխնիկական կանոնակարգման համակարգը» խորագրով սեմինարի շրջանակներում, լրագրողների հետ զրույցում նշել է Շուկայի վերահսկողության տեսչական մարմնի ղեկավար Լեւոն Խալիկյանը:
Նրա խոսքով, սեմինարի նպատակն էր ներկայացնել չափումների միասնականության ապահովման ոլորտում Եվրասիական տնտեսական հանձնաժողովի կողմից հաստատված փաստաթղթերի կիրառումը:
«ԵՏՄ-ի կողմից դեռեւս ամիսներ առաջ ընդունվել են տեխնիկական կանոնակարգերը, որոնց համաձայն՝ տնտեսվարողները պարտավոր են ունենալ համապատասխան սերտիֆիկատ, հայերեն մակնշում»,-ասաց Խալիկյանը՝ հավելելով, որ այսօր արդեն մի շարք ոլորտներում կա բավականին դրական տեղաշարժ, մասնավորապես, խոսքը վերաբերում է կոսմետիկական միջոցների, խաղալիքների, վառելիքի ոլորտներին, որտեղ բացակայում էին համապատասխան սերտիֆիկատները, հայերեն մակնշումները կամ չափագիտական վկայականները:
«Տեխնիկական կանոնակարգերի ընդունումից հետո տնտեսվարողներին իրազեկել ենք համապատասխան կարգերի մասին: Շատ տնտեսվարողներ բարեխղճորեն վերացրել են թերությունները եւ աշխատում են օրենքի շրջանակներում, սակայն կան նաեւ այնպիսիները, որոնց մոտ ստուգման արդյունքում նշանակվել է վարչական տուգանք, տրվել են կարգադրագրեր թերությունները վերացնելու համար»,- ընդգծեց Խալիկյանը:
Նշենք, որ սեմինարը կազմակերպել էր ՀՀ տնտեսական զարգացման եւ ներդրումների նախարարության Շուկայի վերահսկողության տեսչական մարմինը՝ Եվրասիական տնտեսական հանձնաժողովի (ԵՏՀ) հետ համագործակցության շրջանակում ։
1
2
3
4
5
1
2
3
4
5
1
2
3
4
5
