Կրեմլում դեռ չեն ծանոթացել Քենեդու սպանության շուրջ նոր փաստաթղթերին

Կրեմլում դեռ չեն ծանոթացել ԱՄՆ 35-ամյա նախագահ Ջոն Քենեդու սպանության շուրջ նոր փաստաթղթերին, ուրբաթ լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, փոխանցում է «ՌԻԱ Նովոստին»:

Ավելի վաղ հաղորդվել էր, որ ԿՀՎ գաղտնազերծված փաստաթղթերից մեկում ասվում է, որ Քենեդիի մարդասպանը՝  Լի Հարվի Օսվալդը, հանցագործությունից երկու ամիս առաջ եղել է Մեխիկոյում, որտեղ շփվել է խորհրդային դիվանագետի հետ, ով, ամերիկյան հետախուզության տվյալներով, ՊԱԿ աշխատակից է եղել:

«Ոչ, դեռ չենք ծանոթացել, ոչինչ չենք կարող ասել: Նախընտրում ենք ներկայի ու ապագայի հարցերով զբաղվել՝ սովորելով անցյալի դասերից»,- ասել է Պեսկովը:

Ջոն Ֆիցջերալդ Քենեդին սպանվել էր Դալլասում (Տեխասի նահանգ) 1963-ի նոյեմբերի 22-ին: Պաշտոնական վարկածով միայնակ մարդասպանը նախկին ծովային հետևակային Լի Հարվի Օսվալդն է: 2 օր անց Օսվալդը Ջեկ Ռուբիի կողմից գնդակահարվել էր Դալլասի ոստիկանական բաժանմունքում այն ժամանակ, երբ նրան դաշնային բանտ էին տեղափոխում։

Հիշեցնենք, որ ԱՄՆ կառավարությունը հրապարակել է 1963 թվականին ԱՄՆ նախկին նախագահ Ջոն Քենեդու սպանության գործով նախկինում գաղտնազերծված 2800 փաստաթղթեր։ Գաղտնազերծված փաստաթղթերից մեկով հաստատվում է, որ ԱՄՆ Հետաքննությունների դաշնային բյուրոն ոստիկանությանն զգուշացրել է գլխավոր կասկածյալներից մեկի՝ Լի Հարվի Օսվալդի կյանքին սպառնացող վտանգի մասին: «Մենք անմիջապես ոստիկանության ղեկավարին նախազգուշացրեցինք, եւ նա մեզ հավաստիացրեց, որ Օսվալդի համար հուսալի հսկողություն կապահովի»,- նշված է ՀԴԲ առաջին տնօրեն Ջոն Էդգար Գուվերի գրության մեջ: