Ադրբեջանի զինկոմիսարիատը ընդդիմադրի երիկամների քարերը «բուժել» է

Ադրբեջանի ընդդիմադիր NİDA շարժման վարչության անդամ Ուլվի Հասանլին հոկտեմբերի 26-ին հարկադիր կարգով զինծառայության է զորակոչվել: Այս մասին նշված է կազմակերպության հայտարարության մեջ, հայտնում է contact.az-ն:

Նույն աղբյուրի համաձայն՝ անցյալ տարվա սեպտեմբերի վերջին  եւ այս տարվա սկզբին Հասանլին բուժզննում է անցել Զինծառայության հավաքագրման եւ զորակոչի պետական ծառայությունում: Ռեւմատիզմի եւ երիկամային հիվանդության պատճառով Հասանլիին մինչեւ 2019 թվականը ազատել են զինծառայությունից: Սակայն հոկտեմբերի սկզբին Հասանլիին դարձյալ զինկոմիսարիատ են կանչել: Նա մեկ անգամ էլ է բուժզննում անցել: Ուլվիի մոտ ուլտրաձայնային հետազոտությամբ երիկամներում քարեր եւ բորբոքում է հայտնաբերվել: Այդուհանդերձ, նրան լրացուցիչ բուժզննում է նշանակվել: Հոկտեմբերի 25-ին ՈւՁՀ կրկնակի ստուգումից հետո ակտիվիստին հայտնել են, որ նրա երիկամներն «առողջ» են: «Հոկտեմբերի 26-ին Հասանլին բուժզննման է ուղարկվել Սրտաբանական հիվանդանոց, իսկ այնտեղից ռազմական ոստիկանությունը նրան զինկոմիսարիատ է բերել: Այնտեղ Ուլվի Հասանլիից գրավոր ցուցմունքներ են վերցրել եւ զինծառայության ուղարկել մերձճակատային գոտի»,- նշված է Nida-ի հայտարարության մեջ: Շարժումը ուշադրություն է հրավիրում այն հանգամանքի վրա, որ երիտասարդը զինծառայության է ուղարկվել առանց նախնական ծանուցման եւ հարազատներին հրաժեշտ տալու հնարավորության:

Պաշտպանական կողմը մտադիր է դատարաններում վիճարկել Հասանլիի իրավունքների խախտումը, եւ գործը հասցնել Մարդու իրավունքների եվրոպական դատարան: