«Բանկրոտի» ենթարկված ընկերության լացուկոցը եւ դրա աշխատակիցների գերշքեղ մեքենաները կամ ու՞մ աչքերին է կառավարությունը «թոզ փչում». Orer.am

ՀՀ կառավարությունը պարզապես անկրկնելի վատ է աշխատում.

Ինչպես արդեն տեղեկացրել էինք, վաղը` մայիսի 14-ին, ժամը 19.00-ին Ազատության հրապարակում տեղի կունենա հանրային քննարկում եւ բողոքի ակցիա` կապված Էլեկտրաէներգիայի սակագնի թանկացման հետ:

Փաստորեն, չնայած նրան, որ մոտ մեկ տարի առաջ ձեւավորվեց նոր եւ այսպես կոչված օլիգարխիայի դեմ պայքարող կառավարություն, այնուամենայնիվ, տվյալ կառույցի կողմից իրականացվող բացահայտ թալանի մեխանիզմը մնաց անփոփոխ:

Անարդարության եւ կեղեքման պատին գամված հանրությունը այլեւս չի պատրաստվում լռել: Դեռ Հայաստանում գտնվող ՀՀ քաղաքացիները պատրաստ են պայքարել իրենց իրավունքների եւ բարեկեցիկ կյանքի ապահովման համար: Տեսնելով ոտքի կանգնող հանրության տրամադրվածությունը` էներգետիկայի և բնական պաշարների նախարար Երվանդ Զախարյանը որոշեց այնուամենայնիվ հանել թաշկինակը եւ անցել «հինգ մանեթանոց գործելաոճին»:

Նշենք, որ երեկ լրագրողների հետ հանդիպմանը կառավարության համար դոշ տվող նախարարը ընդգծել էր, որ վերջին երեք տարիների ընթացքում ՀԷՑ-ը որոշակի պատճառներով լուրջ վնասներ է կրել և իրավիճակը ստիպում է գնալ սակագնի բարձրացման ճանապարհով: Նա վստահեցրել է, որ կառավարությունն ամեն ինչ արել է, որպեսզի էլեկտրաէներգիան չթանկանա, սակայն այս դեպքում ամեն ինչ չէ, որ կախված է կառավարությունից:

Հռոմի պապից ավելի կաթոլիկ նախարարի գործելաոճին, իհարկե, դեռ կանդրադառնանք, իսկ այժմ բուն խնդրի հետ կապված Orer.am-ն իր ընթերցողներին է ներկայացնում ԱԺ «Ժառանգություն» խմբակցության պատգամավոր, տվյալ խմբակցության քարտուղար Թեւան Պողոսյանի արձագանքը.

«Պատճառաբանությունները մշտապես նույնն են. անհնար է խուսափել թանկացումներից եւ վերջ: Ասեմ, որ անհասկանալի է դառնում, թե սակագների տատանման հիմքում ինչ է ընկած: Խոսքը հաշվարկների սակագների, պահպանման ծախսերի եւ ապագա ներդրումների համար ծախսերի մասին է: Հետաքրքիր է, թե ինչպես է ստացվում, որ ամեն ինչ նախապես հաշվարկվում է, իսկ թանկացումները` ոչ: Ըստ իս` հանրային ծառայությունների հանձնաժողովը պետք է նախաձեռնի երկու մեծ եւ երկար փուլ: Հասկանալի է, որ դիմել են եւ արդյունքում նման խնդիր է առաջացել: Ասեմ, որ դիմումը պետք է անցնի բավական մանրակրկիտ եւ երկար զննություն, պետք է տրվեն մասնագիտական բոլոր գնահատականները, սակայն մինչ այդ քննարկումը գտնում եմ, որ պետք է քննվեն այն կետերը, որոնք ներկայացվել են նախկին դիմումում` սակագնի թանկացման հետ կապված: Պետք է հասկանալ, թե այդ ինչ գործեր են արվել, որ տարին մեկ սակագին է բարձրացվում, հատկապես այն պարագայում, երբ մենք գիտենք, որ գազի գինը սահմանի վրա իջել է: Մինչեւ այս հարցերի պատասխանները չունենան, հանձնաժողովը չպետք է անդրադառնա որեւէ մի կետի: Այլ պարագայում հանձնաժողովը դառնում է այն օղակներից մեկը, որը ամենապարզ լուծումն է տալիս` անխուսափելի է եւ վերջ»:

Թեւան Պողոսյանը նաեւ ուրախությամբ ընդգծեց մեկ հանգամանք, որ այսօր արդեն սոցցանցերում ակտիվորեն հրապարակվում եւ քննարկվում են «բանկրոտի» ենթարկված ընկերության աշխատակիցների գերշքեղ մեքենաները.

«Ուրախ եմ, որ այսօր սոցցանցերում շատ ու շատ նկարներ են հայտնվել, որտեղ երեւում են, թե ինչ մեքենաներ են վարում սնանկ հիմնարկի աշխատակիցները: Այս պարագայում ամեն հարց պետք է անցնի զննության ու դրվի քննարկման: Պետք է ապացուցվի, որ իսկապես որեւէ խախտում չի եղել, իսկ խախտում անողներն էլ պատժվել են: Միայն դրանից հետո կարելի կլինի անդրադառնալ այն հարցին` էլեկտրաէներգիայի գինը պետք է թանկանա, թե ոչ: Եթե թանկանում է, ապա դրա գործընթացը պետք է լինի չափից դուրս թափանցիկ, որ ցանկացած քաղաքացի հասկան, թե որ քայլն ինչպես եւ ինչի համար արվեց»:

Իրոք որ, ազգի կոպեկը մուրացող ընկերությունները, որոնք օրումեջ իբր թե սննկանում են, չափից դուրս լավ են նայում իրենց աշխատողների: Ուր էր թե այսպես շարունակվեր եւ բոլոր ընկերությունները «բանկրոտի» ենթարկվեին: Հավանաբար այդ ժամանակ բոլորս կապրեինք ցոփ ու շվայտ կյանքով…

Սոսե Չանդոյան