Նարեկ Մակարյանն «աբիժնիկներին» խորհուրդ է տալիս ապրել սեփական կյանքով

Երգիչ Նարեկ Մակարյանն արդեն տեւական ժամանակ է, ինչ ԱՄՆ-ում է: Life.panorama.am-ին Նարեկը խուսափեց ժամկետներ նշել, թե երբ կվերադառնա Հայաստան, բայց նաեւ խոսեց այնտեղ մնալու պատճառների մասին:

 

«ԱՄՆ-ն շատ հետաքրքիր վայր է, որտեղ իրադարձությունները շատ արագ են զարգանում ու քեզ էլ մեծ փոփոխությունների են ենթարկում: Հենց այդ ամենից ելնելով էլ` որոշել եմ այստեղ ավելի երկար մնալ, քան նախատեսել էի, քանի որ աշխատանքային մի շարք ծրագրեր ունեմ»,- նշեց երգիչն ու շարունակեց.

 

«Բացի աշխատանքային ծրագրերից, մտածում եմ, որ գուցե ավելի ճիշտ կլինի, եթե այստեղ նաեւ սովորեմ: Երբ հետաքրքրվեցի եւ տեղեկացա, թե ինչ համալսարաններ են այստեղ գործում, ցանկությունս մեծացավ տեղի լավագույն համալսարաններից մեկում ուսում առնել: Այնպես որ, վերադարձիս համար ժամկետներ նշել չեմ կարող»:

Շատերը Հայաստանում կհիշեն Նարեկ Մակարյանի հետ պատահած դեպքերը` մեքենայի եւ մոտոցիկլի կողոպուտը, որոնցից  հետո երգիչը նշում էր, թե ինչ-որ մեկը ցանկություն ունի վնասել իրեն: Հարցին, արդյոք այդ դեպքերն են ազդել, որ Նարեկը մեկնեց  երկրից եւ այժմ էլ դեռ չի պատրաստվում վերադառնալ, պատասխանեց.

 

«Ոչ, այդ դեպքերը մեկնելուս հետ բացարձակ կապ չունեին, քանի որ ԱՄՆ եկա գործնական հրավերով, իսկ երկար ժամանակով այստեղ մնալու ծրագրերս հետո կազմվեցին: Այո, այդ ամենը եղել է իմ կյանքում, բայց դրանք պատճառ չեն կարող դառնալ, որ հրաժարվեմ իմ հայրենիքից: Իմ երկիրը շատ եմ սիրում եւ ոչ մի բանի հետ երբեք չեմ փոխի: Համաձայն եմ, որ իմ անձի հետ հաճախ են ինտրիգներ հյուսվում, արդեն հասկանում եմ ինչի արդյունքն է դա եւ ովքեր են այդ հարցում խառնված: Որոշ մարդկանց պետք է վատաբանել ինձ, նրանք փորձում են այնպես անել, որ երկրպագուներս ինձ ավելի քիչ սիրեն»:

Վերջերս Նարեկ Մակարյանի սոցիալական էջերը փակվեցին: Պարզվում է, որ նրա պաշտոնական էջերը կոտել էին: Այս հարցում եւս Նարեկը դիտավորություն է տեսնում: Ըստ նրա` անգամ իր` ԱՄՆ-ում լինելու փաստը նրանք վատաբանողնեղներին հանգիստ չի տալիս եւ նրանք շարունակում են իր դեմ դավեր նյութել.

 

«Որոշ մարդիկ այնքան պարապ են, որ վերջերս որոշել էին կոտրել իմ պաշտոնական էջերը: Նրանք ինձ համար «աբիժնիկներ» են: Խորհուրդ կտամ ապրել իրենց կյանքով: Ես զարմանում եմ պարզապես, կարծում եմ, որ եթե մարդու համար չարությունը դառնում է նպատակ, ուրեմն նա արդեն կործանված է»,- ավարտեց երգիչը:

 

Հեղինակ` Անուշիկ Մելքոնյան