Հակաժողովրդավարական է Սահմանադրությամբ պարտադրել երկրում մեկ կուսակցության քաղաքական մենիշխանություն

Արթուր Միսակյանը ֆեյսբուքյան իր էջում գրում է.

Եվ այսպես.

Վենետիկի հանձնաժողովը հետաքրքիր հանկարծակիությամբ դեմ է արտահայտվում խորհրդարանական ընտրությունների արդեն իսկ խայտառակ աղմուկ հանած երկրորդ փուլի գաղափարին: Ինչու հետաքրքիր, որովհետև որքանով հիշում եմ 1-7-րդ գլուխները հանձնաժողովի հետ աշխատանքներում է կազմվել: Ինչևէ... 

Չնայած Վենետիկի հանձնաժողովի գնահատականը իրավական ուժ չունի, բայց կարող է քաղաքական նշանակություն ունենալ: 

Այդուհանդերձ.

Ոզնուն էլ է հասկանալի, որ 89-րդ հոդվածի 4-րդ կետը, այն է՝ «Եթե Ազգային ժողովի ընտրությունների առաջին փուլի արդյունքում կայուն խորհրդարանական մեծամասնություն չի ձևավորվում, ապա անցկացվում է քվեարկության երկրորդ փուլ, որին մասնակցում են առավելագույն ձայներ ստացած երկու կուսակցությունները կամ կուսակցությունների դաշինքները», սահմանադրական փոփոխությունների առանցքային կետերից մեկն է, որն իշխանության համար ապահովելու է բացարձակ մեծամասնություն բոլորին հասկանալի հետևանքներով:

Հակաժողովրդավարական է Սահմանադրությամբ պարտադրել երկրում մեկ կուսակցության քաղաքական մենիշխանություն:

Որքանով տեղյակ եմ աշխարհում նման ընտրակարգի նախադեպ չկա: Եթե նույնիսկ լինի էլ, ապա վստահ եմ, այն որևէ կերպ չի կարող համատեղելի լինել մեր քաղաքական իրականության հետ հայտնի պատճառներով: