Ահա թէ ինչ պետք է դնել Ամաորյա սեղանին <<խոզի բդի>> տեղը.
Հայկական մշակութային ժառանգությունն իր բոլոր բաղադրիչներով երկայացման եւ մատուցման կարիք ունի: Ինչպե՞ս կարելի է ոգեշնչել հասարակությանը, հատկապես երիտասարդությանը՝ որպես հայկական մշակույթի եւ ավանդույթների կրողներ, ի վերջո, նաեւ նպաստել հասարակության կողմից մշակույթի՝ որպես զարգացման միջոցի գիտակցմանն ու նոր արժեքներով ներկայացնել հայկական մշակույթը, ավանդական կենցաղը:
«Կաղանդ հայկական ամանորի սեղանը» մշակութային միջոցառումն այդ գործընթացի մեկնարկն է: Այս մասին այսօր լրագրողների հետ հանդիպման ժամանակ խոսեցին «Մենք հանուն ժողովրդավարության» հասարակական կազմակերպության նախագահ, ավագ խոհարար Լեւոն Ավագյանը եւ ազգագրագետ, հաղորդավարուհի Սոնյա Թաշչյանը:
Ասուլիսի ընթացքում Լեւոն Ավագյանն ասաց. «Կաղանդ հայկական ամանորի սեղանը» մշակութային ծրագրի նպատակն է՝ խթանել հայկական մշակույթի զարգացումը, նպաստել հասարակության կողմից մշակույթի՝ որպես զարգացման միջոցի գիտակցման ամրապնդմանը, ներկայացնել եւ տարածել հայկական մշակույթն ու ավանդույթները, նոր արժեքներով մատուցել հայկական ավանդական կենցաղը»:
Իսկ ազգագրագետ Սոնյա Թաշչյանը, խոսելով հայկական ավանդական ամանորյա սեղանի առանձնահատկությունների մասին, առանձնացրեց ծիսական տարեհացը, որը լինում է կլոր կամ ձվաձեւ, մեծությունը` ըստ ընտանիքի անդամների թվի (20-35 սմ տրամագծով):
«Տարեհացի երեսը սերմերով եւ մրգերով զարդարելը խորհրդանշում է տարվա հացի եւ մրգերի առատությունը: Մեջը դնում են «միջինք»՝ լոբի, սիսեռ, փոքրիկ կորիզ կամ մետաղադրամ: Հայկական ամանորյա սեղանի անբաժանելի մասն են աղանձը, անուշապուրը` եփած ձավարով եւ մանրացված չրերով, պասուց դոլման, որն իր մեջ պարունակում է 7 տարբեր հատիկներ: Կերակուրը կոչվում է պասուց, քանի որ քրիստոնեական Նոր տարին պահքի օրեր են եւ պահքը լուծարվում է Հիսուսի ծննդյան տոնին, իսկ 7 հատիկները խորհրդանշում են աստվածային 7 թիվը, որի հիմքում ընկած են աշխարհի 7 տարերքները»,- ասաց ազգագրագետը:
Բանախոսները դեմ են այն փաստին, որ ամանորի սեղանին դնում են խոզի, տավարի միս, առավել եւս՝ կոկորդիլոսի:
«Չկա ավելի համեղ ուտելիք, քան ղափաման: Այն ոչ միայն համեղ է, այլ շատ օգտակար եւ սննդարար»,- նշեց Լեւոն Ավագյանը:
Վերջում բանախոսները խորհուրդ տվեցին, որ հայկական ընտանիքներում ամանորյա սեղանին լինեն հայկական ուտեստներ եւ հրավիրեցին դեկտեմբերի 22-ին «ԿԱՂԱՆԴ» հայկական ամանորի սեղանը» մշակութային վարպետության դասին:
1
2
3
4
5
1
3
4
5
1
2
3
5
