Մի՛ վնասիր, բժիշկ, մի՛ վարվիր այնպես, որ հիվանդին չարիք պատճառես
Լևոն Մութաֆյանը ֆեյսբուքյան իր էջում գրում է.
Հիպոկրատի երդման երրորդ դրույթն այս է.
,, Երդվում եմ օգնել հիվանդներին խղճիս համաձայն, որքան ներեն ուժերս՝ խուսափելով նրանց որևէ վնաս կամ չարիք պատճառելուց,,:
Այսինքն, մի վնասիր, բժիշկ, մի վարվիր այնպես, որ հիվանդին չարիք պատճառես: Երդման տողերը հիշեցինք՝ նորից մտորելով երկու օր առաջ՝ հուլիսի մահվան 29-ին ,,Էրեբունի,, բժշկական կենտրոնում մահացած Մերի Մարգարյանի, մեկ օր անց՝ նրա նորածնի մահվան մասին…
Հերթական աղմկոտ պատմությունը, հերթական հարուցված քրեական գործը: Հերթական դժբախտացած ընտանիքը… Ինչպես տեղեկացրեցին մահացած 26-ամյա Մերի Մարգարյանի հարազատները, այսօր ,,Շենգավիթ,, բժշկական կենտրոնի ղեկավարությունը փորձում է կասկածի տակ առնել իրենց հայտարարություններն այն մասին, որ բուժող բժշկուհին թույլ է տվել անտարբերություն, ոչ պատշաճ վերաբերմունք հիվանդի նկատմամբ, որ այս կենտրոնում միանգամայն սխալ ախտորոշում են արել, ինչը հաստատում են ,,Էրեբունի,, ԲԿ-ում, որտեղ ճիշտ ախտորոշում անելուց հետո, պայքարել են մոր և երեխայի կյանքի համար, սակայն՝ ապարդյուն, քանի որ հիվանդի վիճակը խիստ ծանր է եղել, իսկ երեխան ծնվել է սրտի կանգառով: Մերի Մարգարյանի հարազատներին զայրացնում է այն հանգամանքը, որ ,,Շենգավիթ,, ԲԿ-ում չեն ցանկանում անգամ ցավակցել, մխիթարական խոսքեր ասել: Ավելին, խուսափում են որևէ հոդաբաշխ պատասխան տալ:
Նախաքննություն է ընթանում, ուստի մենք էլ զերծ կմնանք գնահատականներ հնչեցնելուց, սակայն անհնար է ուշադրություն չդարձնել այն հանգամանքին, որ ,,Շենգավիթ,, ԲԿ-ում պնդում են, որ իրենք կասկածել են ուղեղի հետ կապված հիվանդություն, այդ պատճառով էլ ուղարկել են այլ հիվանդանոց: Հենց այն հանգամանքը, որ երկկողմանի թոքաբորբը շփոթել են ուղեղի հետ կապված հիվանդության հետ, խոսում է մասնագիտական ցածր որակի, եթե չասենք՝ անգրագիտության մասին…
Բայց հազիվ թե բազմափորձ բժիշկներն այս աստիճանի անգրագետ լինեին, որ հիվանդի ջերմությունը կապեին ուղեղի հիվանդությանը: Այստեղ գործ ունենք մի երևույթի հետ, որը հաճախ է կիրառվում մեր հիվանդանոցներում: Տեսնելով, որ իրենց անտարբերության կամ սխալ ախտորոշման պատճառով հիվանդի վիճակը ծանրանում է, ԲԿ-ները հիվանդին գործուղում են մեկ այլ հիվանդանոց՝ իրենց բարի համբավը չարատավորելու, մահվան դեպք չարձանագրելու համար: Չէ՞ որ Մերի Մարգարյանի հետ կատարվածից հետո շատերը կխուսափեն,,Շենգավիթ,, ԲԿ-ից, շատ ծննդկաններ այլ հիվանդանոցներ կդիմեն՝ այսպես նաև նվազեցնելով ,,Շենգավիթի,, ֆինանսական հոսքերը…
Ինչ եզրակացության կհանգի նախաքննությունը, ինչպես կորակվի բուժող բժշկի վերաբերմունքը՝ կիմանանք առաջիկայում: իսկ հիմա ընդամենը ուզում ենք հիշեցնել բոլորին՝ մի վնասիր…
1
2
3
4
5
1
3
4
5
1
2
3
5
